Аўторак сырны ўвечары

На "Госпадзе, Цябе клічу...": песьні звычайныя з актойху належнага тону і з мінэі.

(Тон 1). Радасна прымем, верныя, боганатхнёны наказ посту, як некалі ніневіцяне, а за імі блудніцы і мытнікі; як вучыў прапаведнік пакаяньня Ян, устрыманасьцью падрыхтуемся да перасяленьня на Сыён і да ўладарнага сьвятадзеяньня; сьлязьмі папярэдзім Боскае ўмываньне, што мае стацца там. Памолімся, каб нам бачыць спаўненьне вобразу Пасхі тут, і зьяўленьне сапраўднай. Падрыхтуемся, каб пакланіцца Крыжу і ўваскрасеньню Хрыста Бога, клічучы: "Ня дай нам пасаромецца ў нашай надзеі, Чалавекалюбча". (Двойчы)

Добрая купля вашая, сьвятыя, бо, даўшы вашую кроў, вы сталіся спадкаемцамі нябесных дабротаў і, дачасна пацярпеўшы, атрымалі вечную радасьць. Сапраўды добрая ваша купля, бо, пакінуўшы тленнае, вы атрымалі ўзамен нятленнае і, цешачыся разам з анёламі, безустанку славіце Тройцу адзінасутную.

Крыжабагародзічны. Дзева беззаганная, убачыўшы як Той, хто выйшаў з яе бясьсеменнага ўлоньня вісіць на дрэве, і ня могучы перанесьці нясьцерпнага болю, валасы рвучы казала: "Ты, што трымаеш у руцэ сваёй усё стварэньне, як Ты быў узнесены на крыж, быццам асуджаны, хочучы збавіць увесь род людзкі?"

Далей увесь парадак вячэрні ў Вялікі Пост.