18 студзеня - Сьвятаначальнікаў Апанаса і Кірылы, біскупаў Александрыйскіх

Вячэрня

На "Госпадзе, Цябе клічу...":

Апанаса (тон 4). Ты цярпеў перасьлед і вялікія цяжкасьці, пакуль не выкараніў ерась Арыя, і не абараніў статак твой ад нязбожнасьці, навучаючы праўдзіва, што Сын і Дух адзінасутныя з Айцом, сьвятаначальніку блаславёны, ойча пачэсны Апанасе.

Бліскучым прапаведаваньнем ты, Апанасе, прасьвятліў тых, што ў цемры, і адагнаў спакусу; як сапраўдны пастыр, ты дбаў нястомна пра чысьціню веры і быў непарушным умацаваньнем сьвятое Царквы. Дзеля гэтага мы ўсе радасна ў песьнях ушаноўваем цябе.

Навучыўшыся з цярплівасьцю ўсялякай дабрадзейнасьці, ты, боганатхнёны Апанасе, атрымаў сьвятое памазаньне Духа і быў сьвятаначальнікам і сапраўдным пастырам, і змагаром за праўдзівую веру. Дзеля гэтага ўся Царква шануе памяць тваю, спраўляючы сьвята і праслаўляючы Збавіцеля.

Кірылы. Ты, Кірыла, жэзлам навучаньняў тваіх адагнаў ад Хрыстовае Царквы духоўных ваўкоў, абгарадзіў яе і ўмацаваў словам, і прадставіў яе Хрысту непарушнаю і непахіснаю. Малі Яго выбавіць ад тленнасьці ўсіх, што з вераю спраўляюць пачэсную памяць тваю.

Блаславёны і баганосны Кірыла, ты прасьвятліў свой розум зьзяньнем Духа, і сам быў быццам прамяністае сонца, што пасылае промні сваіх навучаньняў, прасьвятляе ўсіх верных, і адганяе цемру ерасяў сілаю Таго, хто зазьзяў ад Дзевы.

Дабрынёю словаў тваіх Царква ўся ўпрыгожваецца, добрапачэсна ўзбагачваецца цудоўнымі дабротамі, і шануе сьвятую памяць тваю, сьвяты Кірыла, прававерных пахвала, айцоў вяршыня, абаронца Усесьвятое Багародзіцы на Саборы.

(Тон 6). Уславім Хрыстовага сьвятаначальніка Апанаса, які зьвёў у нішто выдумкі Арыя, і ва ўсім сьвеце ясна прапаведаваў дзяржаву Сьвятое Тройцы, – адзінага і неразьдзельнага ў трох асобах Бога. Ён моліць Яго за нас, якія з вераю спраўляем ягоную памяць.

Багародзічны (тон 6). Люты вораг, поўны зайздрасьці, усё змагаецца супраць статку Твайго, Усячыстая, каб прыдбаць сабе спажыву, але Ты, Багародзіца, выбаў нас ад такой бяды.

Або:

Крыжабагародзічны (тон 6). Калі Чыстая Дзева і Маці Твая, Збавіцелю, бачыла, як беззаконныя людзі прыбілі Цябе несправядліва да крыжа, душа Яе была параненая, як прадказаў некалі Сямён.

Вершапесьні актойху

(Тон 3). Быццам залатацечны Ніл, аднайменьнік несьмяротнасьці Апанас навадняе ўсіх залатымі струменямі несьмяротнасьці і навучае пакланяцца адзінадзяржаўнай неразьдзельнай Тройцы. Ён крынічыць боскія навукі, поіць розумы верных, і моліцца за душы нашыя.

Багародзічны (тон 3). Багародзіца Дзева Маці, сьвятая між жанчынаў, малі Уладара і Бога, якога Ты нарадзіла, каб Ён збавіў нас у чалавекалюбстве сваім.

Або:

Крыжабагародзічны (тон 3). Калі Ты ўбачыла на крыжы незаходнае Сонца, што зазьзяла з улоньня Твайго і зацьміла промні сонечныя, Ты, прыбітая бязьмерным болем, усклікнула: "Ты, што дабравольна зайшоў, зазьзяй зноў, каб прасьвятліць Мяне і ўвесь сьвет".

Адпушчальны трапар

(Тон 3). Вы зазьзялі ўчынкамі правай веры, усё благое навучаньне пагасілі, і явіліся пераможцамі, правай вераю ўзбагаціўшы ўсіх, Царкву цудоўна ўпрыгожыўшы, і дастойна дасягнулі Хрыста Бога, які дае ўсім веліч зьмілаваньня.