8 лістапада - Сабор сьвятога арханёла Міхала і ўсіх анёльскіх сілаў

На „Госпадзе, Цябе клічу...“:

(Тон 4). Ты, сьветлы арханёле, стаіш у прысутнасьці трохсонечнага Боства, паслугоўваючы Яму і разам з іншымі анельскімі сіламі радасна ўсклікаючы: "Сьвяты Ты, Ойча; Сьвяты Ты, Спрадвечнае з Айцом Слова; Сьвяты Ты і Духу Сьвяты – адзіная слава, адзіная сутнасьць і ўлада, адзінае Боства і сіла".

Выгляд твой, арханёле Міхале, вогненны, і краса твая дзівосная; тваёй духоўнай існасьцю ўвесь сьвет праходзіш, выконваючы загады Творцы ўсіх. Сіла твая вядомаў ўсім: ты наш верны ахоўнік і заступнік, і мы аддаем пашану табе.

Ты, Госпадзе, як напісана, робіш нябесныя духі пасланацамі Тваімі і слугамі Тваімі полымя агню. Сярод анёлаў Тваіх Ты паставіў начальнікам Міхала: ён выконвае Твае загады, і са страхам сьпявае тройчы сьвятую песьню славе Тваёй.

(Тон 4). Розум спрадвечны стварыў цябе, Габрыелю, другім сьветачам: ласкаю, ад Бога атрыманаю, ты прасьвятляеш увесь сьвет і адкрываеш нам спрадвечную вялікую і боскую тайну – ва ўлоньні дзявочым уцелаўлёнага Таго, хто, будучы бесьцялесным, стаўся чалавекам, каб збавіць людзей.

Ты, арханёле Габрыелю, стаіш перад пасадам трохсонечнага Боства, аценены зьзяньнем, што адтуль ўсьцяж праменіць; дзеля гэтага мы на зямлі цешымся і славім цябе, як малельніка за душы нашыя, просячы выбавіць нас ад туману благіх пажаданьняў і прасьвятліць наш розум.

Зьнішчы лютасьць ворагаў, што нападаюць на статак твой, палажы канец разьдзелу ў Царкве, суцішы буру непамерных спакусаў і выбаў ад бедаў і цяжкасьцяў тых, што шануюць цябе, і прыбягаюць пад апеку Тваю, Габрыелю арханёле, малельніку за душы нашыя.

(Тон 6). Радуйцеся з намі, анельскія хоры, бо ваш начальнік і наш заступнік вялікі арханёл, сёньня ў пачэснай царкве сваёй зьяўляецца і асьвячае яе. Дзеля гэтага належна ўславім яго, клічучы: "Пакрый нас покрывам крылаў тваіх, вялікі арханёле Міхале".

У нядзелю дагматык належнага тону, у іншыя дні наступны багародзічны:

(Тон 6). Радуйцеся разам з намі, хоры ўсіх, што вядуць чыстае жыцьцё, бо вось наша Заступніца і хадайніца, наша ахова і вялікае прыстанішча, сёньня ў пачэснай яе і боскай царкве сумных суцяшае. Дзеля гэтага належна ўсхвалім яе, клічучы: Пакрый нас боскім заступніцтвам тваім, Найсьвятая Дзева, Уладарка наша.

Чытаньне кнігі Ісуса Навіна

У той час, калі Ісус быў ля Ерыхону, ён узнёс вочы і ўбачыў мужа з голым мячом у руцэ. Ісус, падышоўшы, спытаў яго: "Ты наш, ці з варожага стану?". Той адаказаў яму: "Я начальнік войскаў Госпада, і вось толькі што прыйшоў сюды." Ісус паў ніцма на зямлю і сказаў яму: "Што загадаеш, уладару, слузе твайму?". Начальнік войскаў Гасподніх адказаў Ісусу: "Скінь абутак з ног тваіх, бо месца, на якім стаіш, сьвятое". Ісус зрабіў так. (5:13-15)

Чытаньне кнігі Судзьдзяў

У той час мадыяніты напалі з вялікай сілаю на сыноў Ізраіля, і тыя ўсклікнулі да Госпада Бога. І вось анёл Гасподні прыйшоў і сеў пад дубам у Гофры, што на зямлі Яаша Абіязаравага. Гедэон, сын ягоны, малаціў пшаніцу ў гумне на таку, каб схаваць яе перад мадыянітамі. І вось зьявіўся яму анёл Гасподні і кажа яму: "Госпад з табою, адважны змагар". І сказаў яму Гедэон: "Выбач мне, спадару, калі Бог з намі, дык адкуль гэта ўся гэтая напасьць на нас? Дзе ўсе тыя цуды, аб якіх айцы нашы расказвалі нам, кажучы: "З Ягіпту вывеў нас Госпад". А сёньня адкінуў нас Госпад і аддаў нас у рукі мадыянітаў". Тады анёл Гасподні глянуў на яго і сказаў: "Ідзі з сілаю тваёю і выбаў Ізраіля з рук мадыянітаў. Ведай, што гэта я пасылаю цябе". "Прашу цябе, спадару, – Гедэон яму ў адказ – як я магу выбавіць Ізраіля? Мой род найбяднейшы ў пакаленьні Манасіі і я найменшы ў доме бацькі майго". Але Госпад адказаў яму: "Я буду з табою, і ты пераможаш мадыянітаў усіх да аднаго". Тады сказаў яму Гедэон: "Калі я знайшоў ласку ў вачох Тваіх, дай мне нейкі знак, што гэта Ты сам гутарыш са мною. Прашу Цябе, не адыходзь адсюль, пакуль я не вярнуся і не прынясу дар мой і палажу яго перад Табою". І сказаў яму анёл Гасподні: "Хай так будзе, пачакаю тут, пакуль вернешся". Гедэон пайшоў, узяў казьля са статку, сьпёк праснакі з адной меры мукі, паклаў іх з мясам у кошык, а поліўку ўліў у збан і, прынёсшы, паставіў пад дубам і пакланіўся. І сказаў яму анёл Гасподні: "Вазьмі мяса і праснакі і палажы іх на той скале, а поліўку вылей". Ён так і зрабіў. Тады анёл Гасподні канцом палкі, якую трымаў у руцэ, дакрануўся да мяса і праснакоў. І вось загарэўся агонь на скале і спаліў мяса і праснакі. І анёл Гасподні зьнік з вачэй ягоных. Тады зразумеў Гедэон, што гэта быў анёл Гасподні, і ўсклікнуў: "Гора мне, Госпадзе Божа, бо я бачыў анёла Гасподняга тварам у твар". Але Госпад адказаў яму: "Мір табе, ня бойся, не памрэш!". Гедэон зрабіў там ахвярнік Госпаду і назваў яго "Мір Гасподні". І ахвярнік гэты знаходзіцца там да сёньняшняга дня. (6:7,11-24)

Чытаньне кнігі прарока Ісаі

Так кажа Госпад: "Хай уся зямля ўсклікне радасна. Нават кіпарысы і кедры лібанскія хай усьцешацца з тваёй прычыны і скажуць: "Ад часу, калі ты заснуў, дрывасекі не выходзяць на нас". Пекла ўнізе сумелася, пачуўшы пра тваё прыйсьце, яно ўзьняло для цябе ўсіх магутных і начальнікаў зямлі, загадала ўсім уладаром народаў устаць з пасадаў сваіх, каб, узьняўшы голас, сказаць табе: "І ты, як і мы, стаўся бясьсільны і да нас падобны". Зышла ў пекла слава твая і твае радасьці, чэрві посьцілкай табе і чэрві тваім покрывам. Як гэта ты зваліўся з неба, бліскатлівы сыне заранкі, як гэта паў на зямлю ты, які падбіваў усе народы? Ты ж сказаў у сэрцы тваім: "Узыду на неба, пастаўлю пасад мой вышэй за зоркі; сяду на высачэзнай гары, што на ўскраіне поўначы; узыду вышэй за хмары і буду падобным Найвышэйшаму". Сёньня ж ты зышоў у пекла, у бездань падзямельную. І тыя, што бачаць цябе, дзівяцца і кажуць: "Ці ж гэта ня той, хто трос зямлёю, хто разбураў валадарствы, пустошыў замлю, руйнаваў гарады і палонных не пускаў да дамоў сваіх?" Усе ўладары народаў спачываюць у пашане, кожны ў сваёй дамавіне. Ты ж выкінены з тваёй магілы, быццам падла гнілое, акружаны мёртвымі, памардаванымі, пабітымі мячамі. Як акрываўленая вопратка ня будзе чыстай, так і ты ня будзеш чыстым, бо ты пустошыў маю зямлю і забіваў людзей маіх. Давеку не будзе ўспаміну пра патомства злачынцаў". (14:7-20)

Вершапесьні

(Тон 1). Разам з анёламі і мы, зямныя, усклікнем радасна Богу, які сядзіць на пасадзе славы: "Сьвяты Ты, Ойча нябесны; Сьвяты ты, справечнае Слова Айца; Сьвяты Ты і Духу ўсесьвяты".

Верш. Ты робіш вятры пасланцамі Тваімі, і слугамі тваімі полымя агню.

Першынствуючы нябесным сілам, ты, начальніча анёлаў Міхале, сузіральніча невыказных рэчаў, стаіш сьмела ў славе перад страшным пасадам. Малітвамі тваімі, просім цябе, выбаў напасьцяў тых, што ў бядзе.

Верш. Хваліце Госпада ўсе анёлы Яго, хваліце Яго ўсе сілы Яго.

Будучы першым сярод бесьцялесных анёлаў, і слугою і сузіральнікам Боскай сьветласьці, збаў, Міхале арханёле, нас, якія набожна шануем цябе і славім верна Тройцу.

Слава... цяпер...

(Тон 8). Як начальнік анельскіх хораў, ваявода і князь, вызваль, арханёле, ад усякай пагрозы, суму, недамаганьняў і цяжкіх правін тых, што верна моляць цябе, слаўны. бо ты бачыш нябачнага Бога і зьзяеш надаступным сьвятлом славы Таго, хто дабравольна дзеля нас прыняў цела ад Дзевы, хочучы збавіць род людзкі.

-------------------------------

(Тон 8). Як начальнік...

Багародзічны нядзельны (тон 8). Чыстая Дзева, што Бога ў целе невыказна зачала, Маці Бога ўсявышняга, прымі маленьні слуг тваіх, Усячыстая, даючы ачышчэньне правін і, выслухаўшы малітвы слуг тваіх, маліся за збаўленьне душ нашых.

Адпушчальныя трапары

Трапар анёлаў (тон 4). Нябесных сіл ваяводы, мы нягодныя няспынна молім вас, каб вы ахінулі нас вашымі малітвамі і пакрылі ценем крылаў духоўнае вашае славы, ахоўваючы нас, якія прыбягаем да вас і клічам: "Ад бедаў выбаўце нас, начальнікі вышніх сіл".

Багародзічны нядзельны (тон 4). Тайна спрадвеку ўкрытая і анёлам няведамая, Табою, Багародзіца, тым, што жывуць на зямлі, сталася яўнаю: Бог прыняў цела ад Цябе, спалучыўшы ў сабе без зьліцьця дзьве прыроды і, пацярпеўшы дзеля нас дабравольна на крыжы, уваскрасіў ім першастворанага і выбавіў ад сьмерці душы нашы.

Ютрань

Пасьля "Госпад – Бог...": трапары, як у канцы вячэрні.

Сядальная песьня 1 (тон 1). Сьветлыя анёлы, што стаіце заўсёды перад страшным Пасадам, прасьветленыя зьзяньнем трохсонечнага Боства, прасьвятліце і адганіце грахоўную цемру ад нас, якія сьвяткуем ваш сабор, і маліцеся няспынна, каб нам выбавіцца ад бедаў.

Слава...: Хоры анёлаў, разам з іхнім начальнікам, боскім Міхалам, пяюць славу ўсесьвятой Тройцы. Той, хто стварыў усё, што існуе з нічога, словам сваім прывёў да быцьця хоры вогненных вояў.

Цяпер... Надзея хрысьціянаў, усесьвятая Дзева, што вышэй за ўвесь роум нарадзіла Бога, разам з анельскімі сіламі прасі, каб Ён даў нам адпушчэньне грахоў усіх нашых, направу жыцьця ўсім, што з вераю і любоўю славяць Цябе.

Сядальная песьня 2 (тон 2). Старшыня анельскіх хораў, арханеле Міхале, што стаіш перад вогненным Пасадам, малі няспынна Найвышэйшага Ўладара, каб Ён зьнішчыў гордасьць мучыцеляў у апраметнай, і заступайся за нас, слугаў Тваіх.

Слава...: (тон 4). Хэрувімы і шматвокія сэрафімы, хоры арханёлаў разам з уладамі, пасадамі, гаспадарствамі, анёламі, сіламі і пачаткамі моляць Цябе, Творцу нашага, каб Ты, Божа ўсеміласэрны, не пагардзіў малітвамі грэшных людзей.

Цяпер...: Дзева беззаганная, што нарадзіла спрадвечнага Бога, разам з анёламі малі Яго безупынку, каб, перш як прыйдзе канец, даў адпушчэньне гарахоў і направу жыцьця нам, якія з вераю і любоўю славім Цябе, адзіная ўсяхвальная.

Паліелей: Хваліце імя Гасподняе...

Узьвялічаньне: Узьвялічваем цябе, арханёле Міхале, і вас, усе анельскія хоры, што няспынна праслаўляеце Госпада.

Верш 1. Дзякую Табе, Госпадзе, ад усяго сэрца, у прысутнасьці анёлаў буду славіць Цябе.

Верш 2. Дзякуйце Госпаду, усе анёлы Яго.

Верш 3. Хваліце Яго ўсе анёлы Яго, хваліце Яго ўсе сілы Яго.

Слава... цяпер...

Алілуя, алілуя, алілуя. Слава Табе, Божа! (Тройчы)

Сядальная песьня 3 (тон 8). Нябесных хораў ваявода і годны слуга славы Божай, ты, загадам Творцы твайго, зьяўляешся збавенным хадайнікам для хрысьціянаў, ахоўваючы іх тваёю духоўнаю славаю. Дзеля гэтага славім цябе, Міхале арханёле. Малі Хрыста Бога дараваць адпушчэньне грахоў нам, якія з любоўю спраўляем сьвята тваё.

Слава...: (тон 4). Арханёлы стаяць вакол Твайго пасаду, Хрысьце Божа, прасьветленыя зьзяньнем, што прамянюе ад яго, і пяюць несьціхана песьню перамогі. Сьвятымі малітвамі іх дай супакой сьвету і душам нашым веліч зьмілаваньня.

Цяпер...: Чыстая і беззаганная Дзева Маці, адзіная, што нарадзіла без мужа ў часе спрадвечнага Сына і Слова Божае, малі Яго разам з бесьцялеснымі пачэснымі нябеснымі сіламі дараваць нам ачышчэньне грахоў і веліч зьмілаваньня.

Узыходная песьня: першы антыфан 4 тону.

Пракімен. Ты робіш вятры пасланцамі сваімі і слугамі сваімі полымя агню.

Верш. Блаславі, душа мая, Госпада. Госпадзе, Божа наш, Ты вялікі наўзьдзіў.

Евангельле: Мц 13: 24-30, 36-43

Пасьля Пс 50:

Слава...: Малітвамі арханёлаў і анёлаў, Міласэрны, ачысьці мноства правінаў нашых.

Цяпер...: Малітвамі Багародзіцы, Міласэрны, ачысьці мноства правінаў нашых.

Зьмілуйся нада мною, Божа...: Анёлы Твае, Хрысьце, што стаяць у страху вакол пасаду велічы Тваёй, прасьветленыя Тваім зьзяньнем, Твае нябесныя песьняры і слугі Тваёй рады, пасланыя Табою, даюць прасьвятленьне душам нашым.

Канон

Песьня 1. Ірмас. Фараона з калясьніцамі Майсей разьбіў цудатворным жэзлам, ударыўшы ім накрыж мора, якое расступілася, і выбавіў Ізраіля, што пехатою ўцякаў, сьпяваючы песьню Богу.

Катавасія. Адчыню вусны мае, і напоўняцца Духам; слова скажу ў гонар Уладаркі Маці, і стану сьвяткаваць сьветлую ўрачыстасьць і славіць радасна ў песьнях цуды Яе.

Песьня 3. Ірмас. Хрысьце, што спачатку неба розумам заснаваў і зямлю над водамі ўсталяваў, умацуй мяне на камені запаветаў Тваіх, бо ніхто не сьвяты, апроч Цябе, адзіны Чалавекалюбча.

Катавасія. У боскай славе Тваёй, Багародзіца, жывая і невычэрпная Крыніца, умацуй аднадушны хор песьняроў Тваіх і зрабі іх дастойнымі вянцоў славы.

Сядальная песьня (тон 8). Начальнікі нябесных сілаў, што стаіце перад высокім Пасадам Боскае славы, Міхале і Габрыелю арханёлы, слугі Ўладара, з усімі бесьцялеснымі сіламі, маліцеся няспынна за ўвесь сьвет і прасіце, каб нам атрымаць адпушчэньне нашых правінаў, і ласку і міласьць у судны дзень.

Слава... цяпер...

Блаславёная чыстая поўная Божай ласкі, разам з усімі нябеснымі сіламі, арханёламі і анёламі малі няспынна Таго, хто добрасардэчнасьці сваёй нарадзіўся ад Цябе, каб нам, перш як прыйдзе канец, атрымаць прабачэньне грахоў, направу жыцьця і і веліч зьмілаваньня.

Песьня 4. Ірмас. Ты маё ўмацаваньне, Госпадзе, Ты мая сіла, Ты мой Бог, Ты мая радасьць! Не пакінуўшы ўлоньня Айца, Ты наведаў нашае ўбоства. Дзеля гэтага разам з прарокам Авакумам клічу: "Слава сіле Тваёй, Чалавекалюбча!"

Катавасія. Хрыстос, Бог спрадвечны, што сядзіць у славе на боскім пасадзе, прыходзіць на хуткай хмары і нятленнай рукою збаўляе тых, што клічуць: "Слава, Хрысьце, сіле Тваёй!"

Песьня 5. Ірмас. Чаму, незаходнае Сьвятло, адкінуў Ты мяне ад Твару Твайго? Цемра варожая пакрыла мяне, няшчаснага. Але Ты навярні мяне і да сьвятла запаветаў Тваіх накіруй шлях мой, малюся.

Катавасія. Усё стварэньне сумелася, убачыўшы боскую славу Тваю: Ты, Дзева, што мужа ня знала, мела ва ўлоньні Бога ўсіх і нарадзіла спрадвечнага Сына, які дае супакой усім, што славяць Цябе.

Песьня 6. Ірмас. Ачысьці мяне, Збавіцелю, бо шматлікія беззаконьні мае, і з глыбіні зла ўздымі мяне, малюся! Цябе клічу, пачуй мяне, Божа збаўленьня майго!

Катавасія. На гэтую боскую і слаўную ўрачыстасьць Божай Маці прыйдзіце, усе багамудрыя, пляскайце ў далоні і слаўце Таго, хто нарадзіўся ад Яе.

Кандак (тон 2). Ваяводы Божыя, слугі Боскае славы, анёлаў начальнікі і людзей настаўнікі, карыснага для нас прасіце і велічы спагады, бо вы князі нябесных сіл.

Ікас. Ты, несьмяротны Чалавекалюбча, сам сказаў, што анёлы ў небе цешацца з аднаго чалавека, які пакаяўся. Таму мы, поўныя беззаконьня, адважваемся прасіць Цябе, адзіны бязгрэшны і добрасардэчны Ўладару, што ведаеш сэрцы людзей, паслаць нам дух каяньне і даць прабачэньне. Аб усіх нас моляцца Табе князі нябесных сіл.

Песьня 7. Ірмас. Боскім зыходам агонь суняўся ў Бабілёне, і юнакі ў печы, быццам на зялёным лузе, весела скакалі і пяялі: "Блаславёны Ты, Божа айцоў нашых!"

Катавасія. Мужныя і багамудрыя юнакі, не захацеўшы служыць стварэньню замест Творцы, вогненнае выпрабаваньне за нішто палічыўшы, радасна сьпявалі: "Усяхвальны Госпад і Бог айцоў, блаславёны Ты".

Песьня 8. Ірмас. Люты мучыцель хальдэйскі распаліў у сем разоў печ для набожных юнакоў, але, ўбачыўшы, як яны былі збаўленыя Вышэйшаю сілаю, усклікнуў Творцу і Збавіцелю: "Юнакі, блаславіце, сьвятары, слаўце ў песьнях, людзі, узьвялічвайце праз усе вякі!"

Катавасія. Народжаны ад Багародзіцы набожных юнакоў у печы выбавіў; тады вобразна, а цяпер дзейсна натхняе Ён увесь сьвет пяяць: "Слаўце, усе стварэньні, Госпада і ўзьвялічвайце Яго на ўсе вякі".

Песьня 9. Ірмас. Неба жахнулася, усе канцы зямлі дзіву даліся: Бог зьявіўся людзям у целе, і ўлоньне Тваё сталася больш прасторным за нябёсы. Дзеля гэтага Цябе, Багародзіца, хоры анёлаў і людзей узьвялічваюць.

Прыпеў. Сьвятыя арханёлы і анёлы, маліце Бога за нас.

Немачных і падарожнікаў, і тых што ў патрэбе, вы явіліся ахоўнікамі і апекунамі, першыя сярод анёлаў, Міхале і Габрыелю.

Саўдзельніку боскіх хораў, сілаў і пасадаў, ваявода анельскі і тайніку Божы, Габрыелю, маліся за нас Збавіцелю.

Ахоўнікі сьвету і царквы, і ваяводы вышніх сілаў, маліце за нас Збавіцеля.

Слава... цяпер...: Аднадушна славім Цябе, Багародзіца, бо Ты збаўляеш нас ад бедаў і спаўняеш просьбы для нашага дабра.

Катавасія. Усе народжаныя на зямлі хай усьцешацца, прасьветленыя Духам. Хай сьвяткуюць бесьцялесныя анельскія хоры і ўшануюць урачыстасьць Божае Маці, і хай пяюць: "Радуйся, усеблаславёная Багародзіца, чыстая заўсёды Дзева!"

Экзапастыляр (Сьвяцільны). Ваявода вогненных слугаў, Міхале, ты атрымаў ад нябеснага Айца моц заступацца за ўсіх нас. Асьветлены зьзяньнем Ягонай славы, ты стаіш каля ўсячыстага Пасаду, як першы з анельскіх чыноў.

Слава...: Ваявода духоўных сілаў, – арханёлаў, анёлаў, гаспадарстваў, пасадаў і пачаткаў, – слаўны арханёле Міхале, што стаіш перад страшным Боскім пасадам, пакрый, захавай, сьцеражы і збаў усіх тых, што з вераю шануюць цябе, як сусьветнага заступніка.

Цяпер...: Ты, Усячыстая Багародзіца, больш пачэсная за хэрувімаў, без параўнаньня больш слаўная за сэрафімаў, і сьвяцейшая за ўсіх анёлаў, бо Ты нарадзіла невыказна ў целе Творцу ўсіх. Малі Яго, каб Ён дараваў адпушчэньне грахоў слугам Тваім.

Пахвальныя псалмы

(Тон 1). Мы верна славім цябе, арханёле Міхале, як нябесных войскаў ваяводу і магутнага ахоўніка і заступніка людзей на зямлі, і просім выбавіць нас ад усякай тленнай немачы.

Ваявода вышніх боскіх сілаў сёньня кліча людзей сьвяткаваць разам з анёламі сьветлую ўрачыстасьць іхняга боскага сабору, і супольна пяяць Богу тройчы сьвятую песьню.

Пад покрыва крылаў тваіх, арханёле Міхале, боскі розуме, прыбягаем з вераю. Ахоўвай нас праз усё жыцьцё, а ў страшную часіну сьмерці будзь нам усім памочнікам і заступнікам.

(Тон 4). Ваяводы нябесныя, прасьветленыя промнямі трохсонечнай Боскай сьветласьці, вы стаіце на чале анельскіх хораў і, быццам сьветачы ясныя на вышынях, прасьвятляеце ўвесь сьвет вашым боскім зьзяньнем, і няспынна пяеце вогненнымі вуснамі тройчы сьвятую песьню: Сьвяты, сьвяты, сьвяты Ты, Божа наш, слава Табе!

Слава...: (тон 5). Дзе толькі прасьціраецца ласка твая, арханёле Міхале, гіне сіла д'ябла, бо ён – раньняя зорка, што ўпала, – ня можа цярпець твайго зьзяньня. Дык просім цябе, слаўны і ўсяхвальны арханёле Міхале, заступніцтвам тваім пагасі ягоныя вогненныя стрэлы, якія ён супраць нас пускае, і захавай нас ад ягоных спакусаў.

Цяпер...: Мы завем Цябе блаславёнаю, Багародзіца Дзева, і ўзьвялічваем Цябе, як места непарушнае, неадольную сьцяну, магутную заступніцу і прыстанішча душ нашых.

Пасьля Вялікага ўслаўленьня: трапар і багародзічны як у канцы вячэрні

Трапар анёлаў (тон 4). Нябесных сіл ваяводы, мы нягодныя няспынна молім вас, каб вы ахінулі нас вашымі малітвамі і пакрылі ценем крылаў духоўнае вашае славы, ахоўваючы нас, якія прыбягаем да вас і клічам: "Ад бедаў выбаўце нас, начальнікі вышніх сіл".

Багародзічны нядзельны (тон 4). Тайна спрадвеку ўкрытая і анёлам няведамая, Табою, Багародзіца, тым, што жывуць на зямлі, сталася яўнаю: Бог прыняў цела ад Цябе, спалучыўшы ў сабе без зьліцьця дзьве прыроды і, пацярпеўшы дзеля нас дабравольна на крыжы, уваскрасіў ім першастворанага і выбавіў ад сьмерці душы нашы.

Літургія

Трапар анёлаў (тон 4). Нябесных сіл ваяводы, мы нягодныя няспынна молім вас, каб вы ахінулі нас вашымі малітвамі і пакрылі ценем крылаў духоўнае вашае славы, ахоўваючы нас, якія прыбягаем да вас і клічам: "Ад бедаў выбаўце нас, начальнікі вышніх сіл".

Кандак (тон 2). Ваяводы Божыя, слугі Боскае славы, анёлаў начальнікі і людзей настаўнікі, карыснага для нас прасіце і велічы спагады, бо вы князі нябесных сілаў.

Пракімен (Пс 103:4,1): Ён робіць вятры пасланцамі сваімі, і слугамі сваімі полымя агню.

Верш. Блаславі, душа мая, Госпада: Госпадзе Божа мой, Ты вялікі наўзьдзіў.

Апостал: Гэб 2:2-10.

Алілуя (Пс 148:2; 32:9). Хваліце Госпада ўсе анёлы Яго, хваліце Яго ўсе сілы Яго.

Верш. Бо Ён сказаў – і сталася, загадаў – і ўсё прыйшло да жыцьця.

Евангельле: Лк 10:16-21

Прычасьнік. Ён робіць вятры пасланцамі сваімі, і слугамі сваімі полымя агню. Алілуя, алілуя, алілуя.