21 лістапада - Уводзіны ў сьвятыню Найсьвяцейшае Багародзіцы

На „Госпадзе, Цябе клічу...“:

(Тон 1). Радуемся сёньня, верныя, уславім у песьнях і псалмах Госпада і аддамо пашану Найчыстай Дзеве, сьвятой і жыцьцяноснай скарбніцы, што зьмясьціла незьмяшчальнае Слова. Сёньня Яна, – яшчэ зусім дзіцятка, – прыводзіцца да Госпада, і сьвятар Захар радасна вітае Яе, як боскае жыльлё.

Сёньня адухоўленая Сьвятыня сьвятое славы – Хрыста Бога нашага, – адзіная блаславёная і чыстая сярод жанчынаў, прыводзіцца ў законную сьвятыню, каб жыць у сьвятым месцы. Якім і Ганна цешацца разам з Ёю, а хоры дзеваў славяць у псалмах Госпада і аддаюць пашану Маці Яго.

Ты, Дзева Маці Божая, – Прапаведаваньне прарокаў, апосталаў Слава, Пахвала мучанікаў і ўсяго роду людзкога Абнаўленьне: Табою мы прымірыліся з Богам. Сёньня, сьвяткуючы Твой уваход у сьвятыню, збаўляемся Тваімі, Усячыстая, малітвамі і разам з анёлам усклікаем Табе: "Радуйся!"

(Тон 4). Сьвятая і Беззаганная ўводзіцца Духам Сьвятым у сьвятое сьвятых і прымае спажыву ад анёла. Яна – найсьвяцейшая сьвятыня Сьвятога Бога нашага, які ейным уваходам асьвяціў усё і абагавіў заняпалую людзкую прыроду.

Дзевы са сьветачамі ў руках сёньня радасна праводзяць Сьветач духоўны і ўводзяць Яе ў сьвятое сьвятых, прадвяшчаючы Сьвятло, што мае невыказна з Яе зазьзяць і прасьвятліць тых, што сядзяць у цемры духоўнага няведаньня.

Цешся, Ганна ўсяхвальная; прымі з радасьцю, Захар, Тую, якую прадказалі прарокі Божыя, і ўвядзі Яе ў сьвятыню, каб Ёй там узгадоўвацца, бо Яна мае быць пасадам, хорамам і сьветлым жыльлём Уладара ўсіх.

Слава... цяпер...: (тон 8). Пасьля Твайго цудоўнага нараджэньня, Богу пасьвячаная Нявеста і Ўладарка, Ты прыйшла ў сьвятыню Гасподнюю, каб, будучы асьвячанай, быць узгадаванай у сьвятым сьвятых. Габрыель быў пасланы да Цябе, Беззаганная, прыносіць ежу. Усе нябесныя зьдізвіліся, калі бачачы, як Дух Сьвяты пасяліўся ў Табе. Дзеля гэтага, Усячыстая і Бязьвінная, праслаўленая ў небе і на зямлі Маці Божая, збаўляй род наш.

Чытаньне кнігі Выхаду

Госпад сказаў Майсею: "У першы дзень першага месяца паставіш шацёр сустрэчы. І пакладзеш там Ківот Запавету і пакрыеш заслонаю. І ўнясеш стол і сьвечнік, і паложыш кадзільніцу залатую, якой кадзіцца перад Ківотам Запавету, і павесіш заслону перад дзьвярамі шатра сустрэчы. І возьмеш алей памазаньня і памажаш шацёр і ўсё, што ў ім, пасьвяціш яго і ўсе ягоныя снасьці, і будзе сьвяты. І асьвяціш ахвярнік, і будзе Сьвяты Сьвятых". Майсей зрабіў усё, як загадаў яму Госпад Бог, Сьвяты Ізраіля. І хмара пакрыла шацёр сустрэчы, і шацёр напоўніўся славаю Гасподняю. І Майсей ня мог увайсьці ў шацёр сустрэчы, бо хмара ацяняла яе і слава Гасподняя напоўніла шацёр. (40: 1-5,9-10,16,34-35)

Чытаньне кнігі Трэціх Царстваў

Калі Саламон скончыў будаваць Дом Гасподні, ён склікаў усіх старэйшых Ізраіля на Сыён, каб перанесьці Ківот Запавету Гасподняга з места Давідавага, або Сыёну. Тады сьвятары ўзялі Ківот Запавету Гасподняга і шацёр сустрэчы, і ўсе сьвятыя посуды, што былі ў шатры сустрэчы. І цар і ўвесь Ізраіль ішлі перад Ківотам. І ўнесьлі сьвятары Ківот Запавету Гасподняга на месца ягонае, унутр сьвятыні, у Сьвятое Сьвятых, пад крылы хэрувімаў, так што хэрувімы распасьціралі зьверху крылы свае над Ківотам і Месцам яго. І не было ў Ківоце нічога апрача дзьвюх каменных дошак Запавету, якія паклаў Майсей туды ў Харэбе, калі Госпад заключыў саюз. І калі сьвятары выйшлі са Сьвятога, зьявілася хмара і напоўніла Дом Гасподні. І з прычыны гэтай хмары сьвятары не маглі адпраўляць службы, бо Дом Госпада ўсемагутнага напоўніўся славаю. (8:1,3-7,9-11)

Чытаньне кнігі прарока Езекіеля

Так кажа Госпад: "Пасьля гэтых дзён, восьмага дня і пазьней сьвятары вашыя павінны прыносіць ахвяры цэлапаленьняў і вашыя мірныя ахвяры, і Я буду спагадлівы да іх". Тады завёў мяне да вонкавай брамы сьвятыні, што была зьвернутая на ўсход, але яна была зачыненая. І сказаў мне Госпад: "Нельга яе адчыняць, і ніхто не павінен уваходзіць праз яе, бо праз яе ўвайшоў Госпад, Бог Ізраіля. Дзеля гэтага яна павінна быць зачыненай. Толькі ўладар можа сесьці ў ёй для застольля. Але ўваходзіць ён павінен праз сені, што ля брамы, і той самай дарогай выходзіць". Пасьля павёў мяне паўночнаю брамаю да сьвятыні. Я глянуў, і вось слава Гасподняя напоўніла сьвятыню Гасподнюю. (43:27-44:4)

Ліцьця

(Тон 1). Хай радуецца сёньня неба, хай хмары росяць радасьць і славяць дзівосную веліч Бога нашага: бо вось Брама, што на ўсход глядзіць, народжаная згодна з абяцаньнем ад няплоднае, і прызначаная быць Божым жыльлём, сёньня ўводзіцца ў сьвятыню, быццам дар беззаганны. Хай радуецца Давід і грае на гусьлях, бо ён сказаў, што прывядуцца Цару дзевы ўсьлед за ёю, дружкі яе прывядуцца ўнутр Каўчэгу Божага, унутр сьвятога месца Яго, дзе Ёй трэба прыгатавацца быць жыльлём для спрадвеку нятленна Народжанага ад Айца для збаўленьня душаў нашых.

(Тон 4). Сёньня Богазьмяшчальная сьвятыня – Багародзіца, – прыводзіцца ў сьвятыню Гасподнюю, і Захар прыймае яе; сёньня Сьвятое Сьвятых радуецца, і анёлы нябачна сьвяткуюць, а з імі і мы, спраўляючы сьвята, усклікаем з Габрыелем: "Радуйся, поўная ласкі, з Табою Госпад, які мае веліч зьмілаваньня".

Прыйдзіце, верныя, усхвалім адзіную Беззаганную, якую прадказалі прарокі, і якая сёньня прыводзіцца ў сьвятыню. Яна – спрадвеку празначаная быць Маці, а ў апошні час аб'явілася нам як Багародзіца. Малітвамі яе, Госпадзе, даруй нам Твой супакой і веліч зьмілаваньня.

Слава... цяпер...: (тон 5). Настала пачэснае сьвята, радасны дзень: Тая, што была дзеваю перад родамі, і пасьля родаў дзеваю засталася, прыводзіцца ў сьвятыню Гасподнюю. Радуецца бацька Прадвесьніка стары Захар і весела ўсклікае: "Заступніца сумных і тых, што ў патрэбе, прыходзіць у сьвятыню, сама ўся сьвятая, каб асьвяціцца і быць жыльлём Уладара ўсіх". Хай цешыцца прабацька Якім, хай радуецца Ганна, бо яны прывялі Богу, як трохгадовае дзіцятка, беззаганную Ўладарку. Маткі, цешцеся разам з імі, дзевы і няплодныя, сьвяткуйце, бо прадказаная Ўладарка адчыніла нам нябеснае валадарства. Дык радуйцеся, людзі, і весяліцеся.

Вершапесьні

(Тон 5). Неба і зямля сёньня цешацца, убачыўшы Неба духоўнае, – адзіную і беззаганную Дзеву, – што прыводзіцца ў Божы дом, каб быць узгадаванай у набожнасьці. Захар у зьдзіўленьні ўсклікнуў: "Брама Гасподняя, адчыняю Табе браму сьвятыні, бо знаю і веру, што збаўленьне Ізраіля ўжо блізка, і ад Цябе народзіцца Бог-Слова, які дае сьвету веліч зьмілаваньня".

Верш. Прывядуцца Ўладару дзевы ўсьлед за ёю, дружкі яе прывядуцца Яму.

Ганна сьвятая, якой праз ласку дадзеная была Чыстая Дзева, прыводзіць Яе з радасьцю ў сьвятыню Гасподнюю, паклікаўшы дзеваў, каб ішлі перад Ёю са сьветачамі. Яна кажа: "Ідзі, дзіця, будзь дарам і духмяным прынашэньнем для Таго, хто даў Цябе мне; увайдзі ў непраходае месца і навучыся тайніцаў Божых, каб быць жыльлём Ісуса, які дае сьвету веліч зьмілаваньня".

Верш. Прывядуцца яны з радасьцю і вясельлем, і ўвойдуць у сьвятыню Гасподнюю.

Богазьмяшчальная Сьвятыня – Дзева ўсесьвятая, – уваходзіць у сьвятыню Божую, і дзевы са сьветачамі суправаджаюць Яе. Цешацца набожныя бацькі Якім і Ганна, бо яны нарадзілі Тую, што мела быць Маці Творцы. Цяпер Яна будзе жыць у сьвятыні Божай і прымаць спажыву ад анёлаў. Яна – Усебеззаганная Маці Хрыста, які дае сьвету багацьце зьмілаваньня.

Слава... цяпер...: (Тон 6). Сёньня, верныя, спраўляем урачыста сьвята і набожна славім Божае дзіця, Дзеву і Багародзіцу, выбраную з усіх пакаленьняў быць жыльлём Уладара ўсіх Хрыста і Бога. Вось Яна прыводзіцца ў сьвятыню Гасподнюю. Дзевы, ідзіце з пашанаю са сьветачамі перад Заўсёды Дзеваю; маткі, пакіньце сум і радасна ідзеце за Маці Бога нашага і Хадайніцай радасьці для ўсяго сьвету. Мы ж усе разам з анёлам ўсклікнем "Радуйся" Абрадаванай, якая няспынна моліцца за душы нашыя.

Адпушчальны трапар

(Тон 4). Сёньня правобраз Божае спагады і абвяшчэньне збаўленьня людзям: Дзева яўна ў Дом Божы ўваходзіць і Хрыста ўсім прадвяшчае. Усклікнем жа ёй на ўвесь голас: "Радуйся, провіду Божага спаўненьне". (Тройчы)

Ютрань

Трапар (тон 4). Сёньня правобраз Божае спагады і абвяшчэньне збаўленьня людзям: Дзева яўна ў Дом Божы ўваходзіць і Хрыста ўсім прадвяшчае. Усклікнем жа ёй на ўвесь голас: "Радуйся, провіду Божага спаўненьне". (Тройчы)

Сядальная песьня 1 (тон 1). Плод праведных Якіма і Ганны прыводзіцца сёньня ў сьвятыню, дзіця векам і карміцелька нашага Жыцьця, якую блаславіў сьвятар Захар. Дык усхвалім Яе ўсе набожна, як Маці Божую. (Двойчы)

Сядальная песьня 2 (тон 4). Ты, Чыстая, была пасьвячаная Богу перад зачацьцем, а пасьля нараджэньня, згодна з абяцаньнем бацькоў, Цябе прывялі ў сьятыню як дар Яму. Існая Божая Сьвятыня і Ўспрыймальніца недасяжнага Боскага сьвятла, Ты прыводзішся ў Божы дом як нявіннае дзіцё, і ў сьвятым месцы пры запаленых сьветачах прабываеш адна. Дзівосны Твой уваход у сьвятыню, адзіная Боганявеста і заўсёды Дзева! (Двойчы)

Паліелей: Хваліце імя Гасподняе...

Узьвялічваньне: Узьвялічваем Цябе, усесьвятая Дзева, Богам выбраная, і славім Твой уваход у сьвятыню.

Верш 1. Вялікі Госпад і поўны славы ў горадзе Бога нашага, на гары сьвятой Яго.

Верш 2. Слаўныя рэчы кажуць пра цябе, места Божае.

Верш 3. Асьвяціў селішча сваё Ўсявышні.

Алілуя, алілуя, алілуя. Слава Табе Божа! (Тройчы)

Сядальная песьня (тон 8). Хай радуецца псалміст Давід, хай цешацца Якім з Ганнаю, бо вось сьвяты плод, які нарадзіўся ад іх, Марыя сьветланосная, Боская сьвечка, уваходзіць у сьвятыню. Сын Барахіі ўбачыў Яе, блаславіў і радасна ўсклікнуў: "Радуйся, сусьветны цуд!" (Двойчы)

Узыходная песьня: першы антыфан 4 тону.

Пракімен (тон 4). Слухай, дачка, глянь, і прыхілі вуха Тваё.

Верш. З сэрца майго б'юць крыніцай прыгожыя словы.

Чытаньне сьвятога Евангельля паводле Лукі

У тыя дні Марыя, устаўшы, пайшла хутка ў горныя мясьціны ў горад (пакаленьня) Юды. І ўвайшла ў дом Захара і прывітала Альжбету. Калі Альжбета пачула прывітаньне Марыі, дзіцятка ва ўлоньні яе заварушылася, і напоўнілася Альжбета Духам Сьвятым. І ўсклікнула моцным голасам, кажучы: "Блаславёная Ты між жанчынаў і блаславёны Плод улоньня Твайго. І адкуль мне гэта, што прыйшла да мяне Маці Госпада майго? Бо вось як толькі голас Твайго прывітаньня загучаў у вушох маіх, дзіцятка ва ўлоньні маім заварушылася з радасьці. Блаславёная Ты, што паверыла, бо споўняцца словы, сказаныя Табе ад Госпада".

Тады сказала Марыя: "Душа мая абвяшчае веліч Госпада і мой дух узрадаваўся ў Богу Збаўцы маім. Бо Ён глянуў на пакорнасьць служкі сваёй: ад гэтага часу шчасьлівай называць мяне будуць усе пакаленьні. Бо вялікія справы ўчыніў мне Ўсемагутны: Сьвятое імя Яго".

Марыя прабыла ў яе тры месяцы і пасьля вярнулася дамоў. (1:39-49,56)

Пасьля Пс 50:

Слава...: (тон 2). Сёньня хорам адухоўлены вялікага Ўладара ўваходзіць у сьвятыню, каб прыгатавацца быць Боскім жыльлём. Весяліцеся, людзі!

Цяпер...: тое самае

Зьмілуйся нада мною, Божа...: (тон 4). Сёньня Богазьмяшчальная сьвятыня – Багародзіца, – прыводзіцца ў сьвятыню Гасподнюю, і Захар прымае Яе; сёньня Сьвятое Сьвятых радуецца, і анёлы нябачна сьвяткуюць, а з імі і мы спраўляем сьвята і ўсклікаем з Габрыелем: "Радуйся, поўная ласкі, з Табою Госпад, які мае веліч зьмілаваньня".

Канон

(Тон 4)

Песьня 1. Ірмас. Адчыню вусны мае, і напоўняцца Духам; слова скажу ў гонар Уладаркі Маці, і стану сьвяткаваць сьветлую ўрачыстасьць і славіць радасна ў песьнях цуды Яе.

Прыпеў. Усесьвятая Багародзіца, збаў нас.

Мы ведаем Цябе, Усячыстая, як скарбніцу мудрасьці і невычэрпную крыніцу ласкі. Дык просім Цябе, Уладарка: дай кроплям мудрасьці Тваёй упасьці на нас, каб нам заўжды славіць Цябе.

Ты, Усячыстая, вышэйшая за нябёсы, хорам і палата, увайшла ў сьвятыню Божую, каб там прыгатавацца быць умяшчальніцай Бога ў час прыйсьця Яго.

Багародзіца дала зазьзяць сьвятлу ласкі, прасьвятліла ўсіх і сабрала ў адно, каб славіць у песьнях Ейную ўрачыстасьць. Дык пойдзем да Яе.

Слаўная брама, непраходная людзкому розуму, адчыняе сёньня дзьверы Божай сьвятыні і запрашае нас ўвайсьці разам з Ёю і цешыцца з Ейных цудаў.

Катавасія. Хрыстос родзіцца – слаўце Яго; Хрыстос зыходзіць з нябёсаў – сустракайце Яго; Хрыстос на зямлі – цешцеся! Сьпявай Госпаду, уся зямля, людзі, радасна вітайце Яго, бо Ён праславіўся.

Песьня 3. Ірмас. У боскай славе Тваёй, Багародзіца, жывая і невычэрпная Крыніца, умацуй аднадушны хор песьняроў Тваіх і зрабі іх дастойнымі вянцоў славы.

Сёньня сьвятыня прымае жывы Хорам Божы і стаецца ўпрыгожаным вясельным хорамам чыстае і беззаганнае Дзевы, што зьзяе ясьней за ўсе стварэньні.

Сёньня Давід сьвяткуе, скача з радасьці і цешыцца з намі. Ён называе Цябе, Дзева Беззаганная, каралеваю, што стаіць упрыгожаная ў хораме перад Уладаром і Богам.

Прысуд прыйшоў некалі праз Эву ўсяму роду людзкому. Цяпер з патомства яе выйшла Багародзіца, якая сёньня прыводзіцца ў дом Божы. Ад Яе заквітнела нятленнасьць і абнаўленьне.

Анельскія хоры сьвяткуюць, а з імі мноства людзей. Сьвечканосцы ідуць у дом Божы перад Табою, Усячыстая, і славяць веліч Тваю.

Катавасія. Спрадвеку ад Айца народжанаму нятленнаму Сыну, што ў апошнія дні ад Дзевы бяз семя прыняў цела, Хрысту Богу пяем: "Ты наша сіла. Сьвяты Ты, Госпадзе!"

Сядальная песьня (тон 4). Скажы, Давідзе, што гэта сёньня за сьвята? Ці ня ў гонар Тае, якую ты ўславіў некалі ў кнізе псалмаў, як Дачку, Дзіця Божае і Дзеву, кажучы: "Прыводзяць яе да ўладара; усьлед за ёю ідуць дзевы, дружкі яе праводзяць яе?" Хай усе верныя сьвяткуюць гэтую ўрачыстасьць і з удзячнасьцю пяюць на ўвесь голас: "Ты, Беззаганная, – нашая слава і збаўленьне!"

Песьня 4. Ірмас. Прарок Авакум прадбачыў невыказны Боскі провід уцелаўленьня Ўсявышняга ад Цябе, Дзева, і ўсклікнуў: "Слава сіле Тваёй, Госпадзе!"

Сёньня дом Божы прымае Браму непраходную і адмяняе службу законную, бо існа зьявілася людзям праўда.

Гара ацененая, якую некалі прадбачыў і прадказаў Авакум, прыйшла ў сьвятыню. Там Яна зацьвіла дабрадзейнасьцямі і сваім ценем пакрыла ўсю зямлю.

Хай уся зямля ўбачыць дзіўны і слаўны цуд, як Дзева прымае ад анёлаў страву і дае нам вобраз Божага провіду.

Ты, Нявеста Ўладара, явілася нам як сьвятыня, хорам і неба адухоўленае. Сёньня Цябе прыводзяць у сьвятыню Гасподнюю, дзе будзеш жыць беззаганнаю.

Катавасія. Як жэзл з кораня Ясеева і кветка, што на ім расьцьвіла, Ты, Хрысьце, зацьвіў ад Дзевы. Ты, Божа, непадуладны законам прыроды, прыйшоў з гары, ацененай лесам, прыняў цела ад Тое, што мужа ня знала. Слава сіле Тваёй, Госпадзе!

Песьня 5. Ірмас. Усё стварэньне сумелася, убачыўшы боскую славу Тваю: Ты, Дзева, што мужа ня знала, мела ва ўлоньні Бога ўсіх і нарадзіла спрадвечнага Сына, які дае супакой усім, што славяць Цябе.

Усячыстая Дзева асьвячаецца сёньня ў сьвятыні Божай, як слаўнае асьвячэньне і сьвятая ахвяра; і ў спосаб вядомы Яму аднаму, захоўваецца як жыльлё Ўладара нашага Бога.

Убачыўшы красу душы Тваёй, Усячыстая, Захар усклікнуў: "Ты – збаўленьне ўсіх і радасьць, Ты нашае пакліканьне, бо праз Цябе Недасяжны стаўся даступным для мяне!"

Вышэй за розум цуды Твае, Усячыстая! Дзівоснае было Тваё нараджэньне, дзіўнае ўзгадаваньне. Усё ў Табе слаўнае, Боганявеста, і недасяжнае для людзей.

Ты, Боганявеста Багародзіца ўсяхвальная, зазьзяла, быццам сьветач, у доме Гасподнім, і прасьвятліла нас пачэснымі Тваімі цудамі.

Катавасія. Як Бог міру і Айцец ласкаў, Ты паслаў нам Анёла вялікае Рады, які нам прынёс супакой. Накіраваныя Ім да сьвятла, сярод нядрэмнай ночы славім Цябе, Чалавекалюбча.

Песьня 6. Ірмас. На гэтую боскую і слаўную ўрачыстасьць Божай Маці прыйдзіце, усе багамудрыя, пляскайце ў далоні і слаўце Таго, хто нарадзіўся ад Яе.

Той, хто словам сваім утрымлівае ўсё, пачуў малітву праведных Якіма і Ганны і, разьвязаўшы путы няплоднасьці, у добрасардэчнасьці сваёй даў ім Прычыну нашай радасьці.

Каб явіць людзям збаўленьне, Госпад выбраў ад людзей Тую, што мужа ня знала, быць знакам прымірэньня і абнаўленьня.

Як дом ласкі, у якім схаваныя невыказныя скарбы Божага провіду, Ты, Усячыстая, сталася ўдзельніцай нятленнай радасьці ў сьвятыні.

Прыняўшы Цябе, Божая Нявеста, як каралеўскую карону, сьвятыня прасьвятлілася, бо пазнала ў Табе зьдзяйсьненьне прадказаньняў прарочых.

Катавасія. Зьвер марскі выкінуў з нутра свайго Ёну, які быў там, быццам дзіця ва ўлоньні. Слова, што было ва ўлоньні Дзевы і ўзяло цела ад Яе, выйшла адтуль, захаваўшы Яе непарушнаю. Будучы непадуладным тленнасьці, Хрыстос захаваў непашкоджанаю Маці сваю.

Кандак (тон 4). Чыстая сьвятыня Збавіцеля, шматкаштоўны хорам і Дзева, асьвячаная скарбніца Божай славы ўводзіцца сёньня ў дом Гасподні і прыносіць з сабою ласку Божага Духа. Анёлы Божыя славяць Яе ў песьнях, усклікаючы: "Вось жыльлё нябеснае!"

Ікас. Бачачы поўню Боскіх ласкаў у Дзеве, цешуся і не магу зразумець невыказнай тайны, як гэта Ўсячыстая была адзіная выбраная з усяго стварэньня, бачнага і нябачнага. Хачу ўславіць і ўзьвялічыць Яе і, хоць не знаходжу годных словаў і думак, асьмельваюся клікаць: "Вось жыльлё нябеснае!"

Песьня 7. Ірмас. Мужныя і багамудрыя юнакі, не захацеўшы служыць стварэньню замест Творцы, вогненнае выпрабаваньне за нішто палічыўшы, радасна сьпявалі: "Усяхвальны Госпад і Бог айцоў, блаславёны Ты".

Вясна радасна зазьзяла па ўсёй зямлі і прасьвятліла ласкаю нашыя думкі, душы і розум. Сёньня сьвята Багародзіцы, дык будзем цешыцца.

Хай сёньня ўсе стварэньні – неба і зямля, хоры анёлаў і мноства людзей, – прыйдуць прывітаць Уладарку Маці Божую, і хай клічуць: "Радасьць і збаўленьне прыводзіцца ў сьвятыню".

Пісаны закон мінуў, як цень, бо зазьзяў прамень ласкі, калі Ты, заўсёды Блаславёная чыстая Дзева, увайшла ў сьвятыню.

Неба, зямля і апраметная былі аддадзеныя пад уладу Сыну Твайму, Усячыстая, як Творцу і Богу, і ўсе народы на зямлі засьведчылі, што зьявіўся Госпад, Збавіцель душаў нашых.

Катавасія. Адкінуўшы з пагардаю нязбожны загад, узгадаваныя ў дабрадзейнасьці юнакі не збаяліся пагрозы агню, але стаялі сярод полымя і сьпявалі: "Божа айцоў нашых, блаславёны Ты!"

Песьня 8. Ірмас. Слухай, Чыстая Дзева, як Габрыель абвяшчае Табе спрадвечную пастанову Ўсявышняга, і будзь гатовая прыняць Бога. Праз Цябе Незьмяшчальны прыйдзе да людзей. Дзеля гэтага радасна клічу: "Усе стварэньні Гасподнія, блаславіце Госпада!"

Ганна, прывяла Ўсячысты Хорам у дом Божы і з вераю сказала сьвятару: "Прымі сёньня Дзіця, дадзенае мне ад Бога, і ўвядзі Яе ў дом Творцы твайго, радасна ўсклікаючы: Усе стварэньні Гасподнія, блаславіце Госпада!"

Захар, убачыўшы Ганну, сказаў: "Ты прыводзіш Маці Жыцьця – Багародзіцу, якую прадказалі прарокі Божыя. Дык як можа сьвятыня ўмясьціць Яе? Дзіўлюся і клічу: "Усе стварэньні Гасподнія, блаславіце Госпада!"

Ганна адказала Захару: "Прыходжу як слуга Божая і малюся з вераю, каб Ён прыняў плод улоньня майго. Бо я абяцала, што пасьля нараджэньня ахвярую Яе Таму, хто даў мне Яе. Дык цяпер клічу: Усе стварэньні Гасподнія, блаславіце Госпада!"

"Ты робіш усё згодна з Законам – сьвятар адказаў ёй. – Тым ня менш дзіўную рэч назіраю, бо бачу, што Тая, якая прыводзіцца ў Дом Божы, перавышае ласкаю Сьвятое Сьвятых. Дзеля гэтага радасна клічу: Усе стварэньні Гасподнія, блаславіце Госпада!"

"Чую словы твае – Ганна кажа, – і поўнюся новай сілаю. Дух Божы даў табе разуменьне, і ты ясна аб'явіў, што мае быць з Дзеваю. Дык прымай Беззаганную ў сьвятыню Творцы твайго і сьпявай Яму радасна: Усе стварэньні Гасподнія, блаславіце Госпада!"

"Ясны сьветач загарэўся для нас – усклікнуў сьвятар, – і радасьцю вялікаю зьзяе ў сьвятыні. Хай душы прарокаў цешацца са мною, бачачы слаўныя рэчы, што дзеюцца ў доме Божым, і хай няспынна клічуць: Усе стварэньні Гасподнія, блаславіце Госпада!"

Катавасія. Печ, мокрая ад расы, была вобразам звышпрыроднага цуду. Як яна не спаліла ўкінутых у яе юнакоў, так агонь Боства, што пасяліўся ў Дзявочым улоньні, не пашкодзіў яго. Дзеля гэтага пяём: "Усе стварэньні хай славяць Госпада і ўзьвялічваюць Яго праз усе вякі!"

Замест "Душа мае абвяшчае веліч Госпада..." бяруцца наступныя прыпевы ў перамешку са строфамі дзевятай песьні:

Прыпеў. Анёлы, убачыўшы ўваход Усячыстае, дзіву даліся, як гэта Дзева ўвайшла ў Сьвятое сьвятых.

Песьня 9. Ірмас. Хай ніякая нячыстая рука не дакранецца да Божай Скарбніцы, і хай вусны верных несьціхана славяць Багародзіцу анельскім прывітаньнем, радасна ўсклікаючы: "Ты, Дзева чыстая, сапраўды вышэйшая за ўсе стварэньні!"

Прыпеў. Анёлы, убачыўшы ўваход Усячыстае, дзіву даліся, як гэта Яна ў славе ўвайшла ў Сьвятое сьвятых.

Багародзіца чыстая, Ты маеш сьветлую дабрыню душэўнае чысьціні, і Ты напоўненая ласкай Божаю з нябёсаў. Сьвятлом несьмяротным Ты прасьвятляеш заўсёды тых, што радасна клічуць: "Сапраўды, Чыстая Дзева, Ты вышэйшая за ўсіх!"

Прыпеў. Анёлы, убачыўшы ўваход Усячыстае, дзіву даліся, як гэта Дзева ўвайшла ў славе ў Сьвятое сьвятых.

Словы бясьсільныя выказаць веліч цуду Твайго, Багародзіца Чыстая. Вялікую тайну бачу ў Табе, бо цела Тваё непадуладнае тленнасьці граху. Дзеля гэтага з удзячнасьцю клічу: "Сапраўды, Чыстая Дзева, Ты вышэйшая за ўсіх!"

Прыпеў. Анёлы і людзі, ушануем уваход Дзевы, што ў славе ўвайшла ў Сьвятое Сьвятых.

Закон прадвясьціў Цябе, Усячыстая, у вобразе Скініі і Боскай манны, як дзівосны Ківот і Заслону царкоўную, жэзл Аарона, сьвятыню незьнішчальную і браму Божую, і навучыў нас клікаць: "Сапраўды, Чыстая Дзева, Ты вышэйшая за ўсіх!"

Прыпеў. Анёлы, убачыўшы ўваход Усячыстае, дзіву даліся, як гэта Дзева, з волі Божае, ўвайшла ў Сьвятое сьвятых.

Давід пяяў хвалу Тваю, называючы Цябе царскай Дачкой, Красою дабрадзейнасьцяў, што стаіць па правай руцэ Бога ў пазалочанай вопратцы. Па-прароцку ён клікаў: "Сапраўды, Чыстая Дзева, Ты вышэйшая за ўсіх!"

Прыпеў. Анёлы, цешцеся разам са сьвятымі, дзевы, радуйцеся, бо вось Божае Дзіця ўвайшло ў Сьвятое сьвятых.

Саламон прадбачыў, як Ты прымеш Бога, і назваў Цябе Брамай Божай і жывой Крыніцаю запячатанай, адкуль плывуць чыстыя воды для нас, якія клічам: "Сапраўды, Чыстая Дзева, Ты вышэйшая за ўсіх!"

Прыпеў. Анёлы і людзі, узьвялічым у песьнях Дзеву, што сёньня набожна ўвайшла ў Сьвятое сьвятых.

Дай, Багародзіца, душы маёй у дары Твой ціхі супакой. Ты – крыніца жыцьця для тых, што шануюць Цябе. Абарані, пакрый і захавай нас, каб нам клікаць: "Сапраўды, Чыстая Дзева, Ты вышэйшая за ўсіх!"

Катавасія. Дзіўную і слаўную бачу тайну: пячора – неба, Дзева – пасад хэрувімскі, ясьлі – жыльлё, у якім памясьціўся Незьмяшчальны Хрыстос, якога мы ў песьнях славім.

Экзапастыляр. Усхвалім у веры Марыю, Дзіця Божае, якую некалі прарокі прадказалі, называючы Яе Маннай і Жэзлам Аарона, Табліцай Закону і нясечанай Гарой, бо сёньня Яна ўводзіцца ў Сьвятое Сьвятых, каб быць узгадаванай для Госпада. (Тройчы)

Пахвальныя псалмы

(Тон 4). Дзевы са сьвячамі, што праводзяць Заўсёды Дзеву, прадказваюць духам будучыню: вось Сьвятыня Божая Багародзіца, яшчэ дзіцё, у сьвятыню ўводзіццца ў дзявочай славе.

Блаславёны плод сьвятога абяцаньня, Багародзіца, вышэйшая за ўсе стварэньні, пад ахоўваю Боскага Духа прыводзіцца ў сьвятыню Божую згодна з абяцаньнем бацькоў.

Ты, Дзева, што была кормленая хлебам у сьвятыні Гасподняй, нарадзіла сьвету Хлеб Жыцьця – Слова. Будучы Ягонай выбранай і беззаганнай Сьвятыняю, Ты заручылася Яму тайна, каб быць Нявестай Бога Айца.

Хай дзьверы сьвятыні, дзе Бог жыве, адчыняцца, бо сёньня яна прымае са славаю Сьвятыню і Пасад Уладара ўсіх. Якім прыводзіць Тую, якая была пасьвячаная Госпаду і прызначаная быць Ягонай Маці.

Слава... цяпер...: (тон 2). Сёньня Беззаганная Дзева прыводзіцца ў сьвятыню, каб быць аселішчам Уладара ўсіх Бога, які дае і ўтрымлівае наша жыцьцё. Сёньня пачэсная Сьвятыня, як трохгадовае дзіця, уводзіцца ў Сьвятое Сьвятых. Дык усклікнем Ёй: "Радуйся, адзіная Блаславёная сярод жанчынаў!"

Пасьля Вялікага ўслаўленьня:

Трапар (тон 4). Сёньня правобраз Божае спагады і абвяшчэньне збаўленьня людзям: Дзева яўна ў Дом Божы ўваходзіць і Хрыста ўсім прадвяшчае. Усклікнем жа ёй на ўвесь голас: "Радуйся, провіду Божага спаўненьне!"

Трапар (тон 4). Сёньня правобраз Божае спагады і абвяшчэньне збаўленьня людзям: Дзева яўна ў Дом Божы ўваходзіць і Хрыста ўсім прадвяшчае. Усклікнем жа ёй на ўвесь голас: "Радуйся, провіду Божага спаўненьне!"

Кандак (тон 4). Чыстая сьвятыня Збавіцеля, шматкаштоўны хорам і Дзева, асьвячаная скарбніца Божай славы ўводзіцца сёньня ў дом Гасподні, прыносячы з сабою ласку Божага Духа. Анёлы Божыя славяць Яе ў песьнях, усклікаючы: "Вось жыльлё нябеснае!"

Пракімен (Лк. 1:46-47). Душа мая абвяшчае веліч Госпада, і мой дух узрадаваўся ў Богу Збаўцы маім.

Верш. Бо Ён глянуў на пакорнасьць служкі сваёй: ад гэтага часу шчасьлівай называць мяне будуць усе пакаленьні.

Чытаньне лісту сьвятога Апостала Паўла да гэбрэяў

Браты, першы запавет меў свае ўставы служэньня і зямную сьвятыню. Гэта быў шацёр, у першай частцы якога быў сьветач, і стол, і складаньне хлябоў: называлася яна "сьвятым (месцам)". За другою ж заслонаю была сьвятыня, званая "сьвятое сьвятых". Мела яна залаты ахвярнік для кадзіла і Каўчэг Запавету, увесь акованы золатам, у якім была залатая судзіна з маннаю і жазло Аарона, што расьцьвіло, і дошкі Запавету. А над ім хэрувімы славы, што крыламі ацянялі месца ачышчэньня. Але аб гэтым няма патрэбы цяпер гаварыць падрабязна. Пры такім уладкаваньні ў першую частку сьвятыні ўваходзяць заўсёды сьвятары адпраўляць службы; а ў другую – раз у год адзін толькі першасьвятар, не без крыві, якую прыносіць ў ахвяры за грахі свае і свайго народу.

Алілуя (Пс. 44:11,13). Слухай, дачка, глянь і прыхілі вуха тваё.

Верш. Вяльможы людзкія будуць шукаць ласкі ў цябе.

Чытаньне сьвятога Евангельля паводле Лукі

У той час Ісус увайшоў у адну вёску, і жанчына, на імя Марта, прыняла Яго ў свой дом. У яе была сястра, – звалася яна Марыя – якая села ля ног Ісусавых і слухала Ягонае слова. Марта ж увіхалася каля паслугі і, падышоўшы, сказала: "Госпадзе, ці ж Цябе ня рупіць, што мая сястра пакінула мяне адну паслугоўваць? Скажы ёй, каб дапамагла мне". Ісус адказаў ёй: "Марта, Марта, ты турбуешся і клапоцішся аб многім, а адно толькі патрэбнае. Марыя выбрала лепшую частку, якая не адбярэцца ад яе".

Калі Ён гаварыў гэта, нейкая жанчына з народу, узвысіўшы голас, сказала: "Шчасьлівае ўлоньне, што насіла Цябе, і грудзі, які Ты ссаў". А Ён адказаў: "Сапраўды, шчасьлівыя тыя, што чуюць слова Божае і захоўваюць яго". (10:38-42; 11:27-28)

Задастойнік. Анёлы, убачыўшы ўваход Усячыстае, дзіву даліся, як гэта Дзева ўвайшла ў Сьвятое сьвятых.

Хай ніякая нячыстая рука не дакранецца да Божай скарбніцы, і хай вусны верных несьціхана славяць Багародзіцу анельскім прывітаньнем, радасна ўсклікаючы: "Ты, Дзева чыстая, сапраўды вышэй за ўсе стварэньні".

Прычасьнік. Чашу збаўленьня прыму, буду клікаць імя Гасподняе. Алілуя, алілуя, алілуя.