Магутная Уладарка Багародзіца, мы, верныя слугі Твае, выбаўленыя Табою ад бедаў, песьні ўдзячнасьці і перамогі Табе прыносім. Ты ж, маючы сілу непераможную, ад усякіх напасьцяў выратуй нас, каб нам усклікнуць: "Радуйся, Дзева Маці!"

Князь анёлаў быў пасланы з неба сказаць Багародзіцы "Радуйся". Убачыўшы, як Ты, Госпадзе, прыняў цела ад Яе, калі яшчэ ня сьціх бесьцялесны гук ягоных слоў, ён сумеўся і ўсклікнуў:

Радуйся, бо дзякуючы Табе радасьць зазьзяе!

Радуйся, бо праз Цябе згіне праклён!

Радуйся, Узьняцьце з падзеньня Адама!

Радуйся, Вызваленьне Эвы ад сьлёзаў!

Радуйся, недасяжная Вышыня думак людзкіх!

Радуйся, Глыбіня непранікальная нават для анёлаў!

Радуйся, Пасад Уладара!

Радуйся, Носьбітка Таго, хто носіць усё!

Радуйся, Зорка, праз якую сонца зазьзяла!

Радуйся, Улоньне Божага ўцелаўленьня!

Радуйся, бо праз Цябе абнаўляецца ўсё стварэньне!

Радуйся, бо праз Цябе пакланяемся Творцу!

Радуйся, Дзева Маці!

Ведаючы сваё чыстае дзявоцтва, Сьвятая сьмела адказвае Габрыелю: "Дзіўнымі і цяжкімі да ўспрыняцья для душы маёй здаюцца словы твае: што гэта ты кажаш мне пра нараджэньне бязь семя зачатага і клічаш: Алілуя!"

Хочучы спазнаць непазнавальнае, Дзева сказала анёлу: "Скажы мне, як можа сын нарадзіцца ад дзевы!" А той у адказ са страхам усклікнуў:

Радуйся, Удзельніца тайніцы провіду Божага!

Радуйся, Вера ў тое, што застаецца таемным!

Радуйся, Пачатак цудаў Хрыстовых!

Радуйся, Спаўненьне навучаньняў Ягоных!

Радуйся, Лесьвіца нябесная, па якой Бог зышоў!

Радуйся, Мост, які вядзе людзей да неба!

Радуйся, Подзіў шматгалосны анёлаў!

Радуйся, Плач пераможаных бесаў!

Радуйся, бо Ты ў невыказны спосаб народзіш Сьвятло!

Радуйся, бо Ты не аб'явіла тайніцы нікому!

Радуйся, вышэйшая за мудрасьць усіх вучоных!

Радуйся, Заранка, што асьвятляе розумы верных!

Радуйся, Дзева Маці!

Сіла Усявышняга ацяніла тады Бязьвінную, і Яна зачала. Ён явіў ейнае дабраплоднае ўлоньне, быццам ніву ўрадлівую для ўсіх, што жадаюць жаць збаўленьне і клічуць: Алілуя!

Маючы ва ўлоньні сваім Бога, Дзева пасьпяшыла да Альжбеты, сын якое ва ўлоньні яе, пачуўшы прывітаньне, усьцешыўся і ўзварухнуўся, быццам хацеў уславіць Багародзіцу песьняю:

Радуйся, Галінка неўвядальнага куста!

Радуйся, Набытак несьмяротнага плоду!

Радуйся, бо Ты ўзрасьціла чалавекалюбнага Земляроба!

Радуйся, бо Ты нарадзіла Садоўніка жыцьця нашага!

Радуйся, Ніва, што прыносіць багаты плод ласкаў!

Радуйся, Стол, поўны багацьця спагады!

Радуйся, бо праз Цябе рай зноў зацьвітае!

Радуйся, бо Ты рыхтуеш супакаеньне душам!

Радуйся, духмяны Пах малітвы!

Радуйся, Ачышчэньне ўсяго сьвету!

Радуйся, Божая Спагадлівасьць да людзей!

Радуйся, Адвага нас, сьмяротных, зьвяртацца да Бога!

Радуйся, Дзева Маці!

Праведны Язэп сумеўся, гледзячы на Цябе, Бязьвінная, і, спакусіўшыся, усумніўся ў Тваім дзявоцтве. Калі ж даведаўся, што гэта сталася праз Духа Сьвятога, ён усклікнуў: Алілуя!

Пастухі пачулі галасы анёлаў, якія славілі прыйсьце Хрыста ў целе, і пабеглі да Яго, як да Пастыра. Убачыўшы Таго, хто, быццам ягнё беззаганнае, быў ускормлены ва ўлоньні Марыі, яны ўславілі Яе і ўсклікнулі:

Радуйся, Маці Ягняці і Пастыра!

Радуйся, Двор статку духоўных авечак!

Радуйся Ты, што праганяеш нябачных зьвераў!

Радуйся, Ключ да райскай брамы!

Радуйся, бо ў Табе ўсё нябеснае цешыцца з зямным!

Радуйся, бо Табе зямля і неба разам пяюць!

Радуйся, незмаўкальны Голас апосталаў!

Радуйся, непераможная Адвага мучанікаў!

Радуйся, непахісная Аснова веры!

Радуйся, сьветлае Аб'яўленьне ласкі!

Радуйся, бо праз Цябе пекла апусьцела!

Радуйся, бо дзякуючы Табе мы апрануліся ў славу!

Радуйся, Дзева Маці!

Мудрацы ўгледзелі зорку, што вяла да Бога, і пайшлі за ёю. Зьзяньне яе, быццам ліхтар, асьвятляла ім шлях да магутнага Уладара, і яны, знайшоўшы Недасяжнага, усклікнулі: Алілуя!

Сыны Хальдэйскія ўбачылі на рукох Дзевы Таго, хто рукою сваёю людзей стварыў, і зразумелі, што Ён – Уладар, хоць і прыняў выгляд слугі. Яны пасьпяшылі ўшанаваць Яго падарункамі, і ўсклікнулі Блаславёнай:

Радуйся, Маці незаходнай зоркі!

Радуйся, Сьвітанак таемнага дня!

Радуйся, бо Ты патушыла агонь маны!

Радуйся, Прасьвятленьне пасьвечаных у тайніцу Тройцы!

Радуйся, бо Ты чалавеканенавісьніка пазбавіла моцы!

Радуйся, бо Ты аб'явіла нам Госпада Хрыста Чалавекалюбца!

Радуйся, бо Ты выбавіла нас ад ідаласлужэньня!

Радуйся, боТы ратуеш нас з твані нячыстых спраў!

Радуйся, бо Ты пагасіла пакланеньне агню!

Радуйся, Вызваленьне ад полымя грэшных думак!

Радуйся, Настаўніца і Прыклад чысьціні для верных!

Радуйся, Радасьць усіх народаў!

Радуйся, Дзева Маці!

Мудрацы вярнуліся ў Бабілён баганоснымі вестунамі і, спаўняючы прароцтва Тваё, прапаведавалі ўсім Цябе як Хрыста. Яны пакінулі Ірада, як пустаслова, што ня ўмеў пяяць: Алілуя!

Ты, Збавіцелю, прасьвятліў Ягіпет сьвятлом праўды і разьвеяў цемру маны; ідалы ягоныя, ня ў змозе ўстаяць перад Тваёю сілаю, упалі; а людзі, выбаўленыя ад іх, уславілі Багародзіцу:

Радуйся, Папраўленьне людзей!

Радуйся, Упадак бесаў!

Радуйся, бо Ты перамагла сілу маны!

Радуйся, бо Ты выкрыла ілжу ідалапаклонства!

Радуйся, Мора, што патапіла духоўнага Фараона!

Радуйся, Скала, з якой цячэ вада для тых, што жадаюць жыцьця!

Радуйся, вогненны Слуп, што асьвятляе шлях для тых, што ў цемры!

Радуйся, Покрыва сьвету, больш шырокае за неба!

Радуйся, Ежа, што замяніла манну!

Радуйся, Служка сьвятой радасьці!

Радуйся, абяцаная Зямля!

Радуйся, Крыніца, з якой цячэ мёд і малако!

Радуйся, Дзева Маці!

Да Сямёна, якому настаў час сысьці з гэтага зманлівага сьвету, прынесьлі Цябе як дзіцятка; але ён спазнаў у Табе дасканалага Бога і, дзівячыся з Тваёй невыказнай мудрасьці, усклікнуў: Алілуя!

Творца зьявіўся і паказаў нам, тварэньням сваім, новы твор: Ён выйшаў з бясьсеменнага ўлоньня Дзевы, захаваўшы Яе непарушнаю, каб мы, бачачы гэты цуд, уславілі Яе:

Радуйся, Кветка нятленнасьці!

Радуйся, Вянец устрыманасьці!

Радуйся, сьветлы Вобраз уваскрасеньня!

Радуйся, Прыклад жыцьця анельскага!

Радуйся, Дрэва салодкаплоднае, што корміць верных!

Радуйся, Куст, у цені лісьцяў якога многія знаходзяць прыпынак!

Радуйся, бо Ты нарадзіла Правадніка тых, што зблудзілі!

Радуйся, бо Ты насіла ва ўлоньні Выкупіцеля палонных!

Радуйся, Уміласьціўленьне праведнага Судзьдзі!

Радуйся, Прабачэньне многіх грэшнікаў!

Радуйся, Вопратка зьнявераных!

Радуйся, Любоў, што ўсякае жаданьне пераўзыходзіць!

Радуйся, Дзева Маці!

Бачачы дзівоснае нараджэньне, аддалімся ад сьвету і перанясемся думкаю на неба: вось Найвышэйшы Бог упакорыўся і зьявіўся на зямлі як чалавек, каб узьняць да нябеснай вышыні тых, што клічуць: Алілуя!

Неўмяшчальнае Слова было поўнасьцю прысутнае на зямлі, не пакінуўшы неба: бо гэта было не перамяшчэньне, але Божая спагада, што нарадзілася ад Дзевы, якая прыняла Бога і пачула такое ўсхваленьне:

Радуйся, Умяшчальня неўмяшчальнага Бога!

Радуйся, Брама сьвятой тайніцы!

Радуйся, Зьбянтэжанасьць няверных!

Радуйся, несумненная Слава верных!

Радуйся, сьвятая Калясьніца Таго, хто сядзіць на хэрувімах!

Радуйся, слаўнае Селішча Таго, хто спачывае на сэрафімах!

Радуйся, бо Ты зьяднала супрацьлеглае!

Радуйся, бо Ты спалучыла дзявоцтва і мацярынства!

Радуйся, бо праз Цябе наш грэх быў адкуплены!

Радуйся, бо праз Цябе рай быў адчынены!

Радуйся, Ключ Хрыстовага валадарства!

Радуйся, Надзея вечных дабротаў!

Радуйся, Дзева Маці!

Усе анёлы зьдзівіліся, угледзеўшы веліч уцелаўленьня Твайго: Недаступны Бог, Ты стаўся даступным для людзей, жыў сярод іх і чуў, як яны ўсклікаюць: Алілуя!

Шматслоўныя красамоўцы моўкнуць, быццам рыбы, перад Табою, Багародзіца: яны ня ў змозе аб'ясьніць як Ты сталася маці, застаўшыся дзеваю. Мы ж, дзівячыся гэтай тайніцы, з вераю клічам:

Радуйся, Сховішча мудрасьці Божай!

Радуйся, Скарбніца Ягонага провіду!

Радуйся, бо Ты паказваеш нямудрасьць мудрых!

Радуйся, бо Ты вучоных бязмоўнымі чыніш!

Радуйся, бо Ты дапытлівых у замяшаньне прыводзіш!

Радуйся, бо Ты змушаеш змоўкнуць казачнікаў!

Радуйся, бо Ты разбурыла разважаньні атэнцаў!

Радуйся, бо Ты напаўняеш сеці рыбакоў!

Радуйся, бо Ты ратуеш людзей з глыбіні няведаньня!

Радуйся, бо Ты прасьвятляеш усіх ведаю!

Радуйся, Карабель для тых, што жадаюць збаўленьня!

Радуйся, Прыстанішча для тых, што плывуць па моры жыцьця!

Радуйся, Дзева Маці!

Творца ўсяго прыйшоў з уласнай волі на сьвет, каб збавіць яго. Бог і Пастыр, Ён зьявіўся дзеля нас, авечак сваіх, як чалавек. Паклікаўшы падобнае падобным, як Бог Ён пачуў: Алілуя!

Багародзіца Дзева, Ты абаронная сьцяна для дзеваў і ўсіх, хто прыбягае да Цябе. Творца неба і зямлі ўпрыгожыў Цябе, пасяліўшыся ва ўлоньні Тваім, Усячыстая, і навучыўшы нас клікаць:

Радуйся, Стоўп дзявоцтва!

Радуйся, Брама збаўленьня!

Радуйся, Пачатак духоўнага адраджэньня!

Радуйся, Крыніца Божай міласэрнасьці!

Радуйся, бо Ты абнавіла народжаных у граху!

Радуйся, бо Ты неразумных да розуму прыводзіш!

Радуйся, бо Ты скрышыла таго, хто разбэшчвае думкі!

Радуйся, бо Ты нарадзіла Сейбіта чысьціні!

Радуйся, вясельны Пакой духоўнага шлюбу!

Радуйся, бо Ты зьяднала верных з Госпадам!

Радуйся, ласкавая Ўзгадавальніца дзеваў!

Радуйся, надзейная Ахоўніца сьвятых душаў!

Радуйся, Дзева Маці!

Усіх песьняў замала, каб належна ўславіць безьліч ласкаў Тваіх. Калі б, Уладару Сьвяты, нашых песьняў было як пяшчынак на беразе мора, то і гэта было б як нішто ў параўнаньні з тым, што Ты ўчыніў для нас, якія клічам: Алілуя!

Мы бачым Сьвятую Дзеву, што, быццам ясны сьветач, сьвеціць тым, што ў цемры. Запаліўшы духоўны Агонь, Яна прыводзіць усіх да пазнаньня Бога і прасьвятляе розум. Дзеля гэтага славім Яе і пяём:

Радуйся, Прамень нябачнага духоўнага сонца!

Радуйся, Блістаньне незаходнага сьвятла!

Радуйся, Маланка, што асьвятляе душы нашыя!

Радуйся, Гром, страшны для ворагаў!

Радуйся, Заранка, што прадвяшчае вялікае Сьвятло!

Радуйся, Крыніца, з якой цячэ шматструменная рака!

Радуйся, Правобраз ачышчальнага хросту!

Радуйся, бо Ты адымаеш агіду граху!

Радуйся, Вада, што абмывае сумленьне!

Радуйся, Чаша, поўная радасьці!

Радуйся, Запах Хрыстовай духмянасьці!

Радуйся, Ажыцьцяўленьне тайнай радасьці!

Радуйся, Дзева Маці!

Каб даць вызваленьне ад старых даўгоў, Той, хто сплочвае даўгі ўсіх людзей, сам зышоў да тых, што адышлі ад Ягонай ласкі; разарваўшы сьведчаньне віны, Ён пачуў ад усіх: Алілуя!

Славім Тваё мацярынства і аддаем хвалу Табе, Багародзіца, як адухоўленай сьвятыні, бо ў Тваім улоньні пасяліўся Госпад, які трымае ўсё ў сваёй руцэ. Ён асьвяціў і ўславіў Цябе, і навучыў нас пяяць Табе:

Радуйся, Селішча Бога Слова!

Радуйся, Вышэйшая за сьвятое сьвятых!

Радуйся, Ківот пазалочаны Духам!

Радуйся, невычэрпная Скарбніца жыцьця!

Радуйся, шмакаштоўны Вянец добрых уладароў!

Радуйся, Пахвала пабожных сьвятароў!

Радуйся, непарушны Стоўп Царквы!

Радуйся, незьнішчальная Сьцяна Валадарства!

Радуйся, бо праз Цябе сьцяг перамогі ўзносіцца!

Радуйся, бо Табою ворагі перамагаюцца!

Радуйся, Лекарка цела майго!

Радуйся, Збаўленьне душы маёй!

Радуйся, Дзева Маці!

Усяхвальная Маці, што нарадзіла Слова, сьвяцейшае за ўсіх сьвятых! Прымі гэтыя нашыя малітвы, выбаў ад усякіх бедаў, і вызваль ад будучых мукаў тых, што пяюць Табе: Алілуя!

Канец Акафісту ў гонар і на славу Найсьвяцейшае Багародзіцы і Заўсёды Дзевы Марыі

Малітвы пабожныя да Найсьвяцейшай Багародзіцы Марыі пасьля Акафісту (з Малой Падарожнай Кніжкі Францішка Скарыны)

Радуйся, усесьвятая Марыя, Служка жыцьцядайнае Тройцы

Радуйся, духмяная Лілея, улюбёная Творцы Бога Айца;

Радуйся, найчыстая Дзева, Маці Госпада нашага Ісуса Хрыста;

Радуйся, наймілейшая Галубка, жаданая Суцяшальніка Духа Сьвятога;

Радуйся, найдастойнейшая Спадарыня, радасьць хораў анёльскіх;

Радуйся, Вежа непранікальная і Мучэньне збораў бесаўскіх;

Радуйся, найпрыгажэйшая Дачка і Развязаньне граху Адамавага;

Радуйся, моцная Вера, і Зьнішчэньне праклёну Эвінага;

Радуйся, слаўная Ўладарка, Мэта ўсіх патрыярхаў;

Радуйся, існая Багародзіца, Памнажэньне сыноў Ізраілевых;

Радуйся, усяхвальная Слава і Спаўненьне ўсіх сказаньняў прароцкіх;

Радуйся, мудрая Галава і Навучаньне Хрыстовых апосталаў;

Радуйся, усясьветлая Хвала і Ласка чатырох евангелістаў;

Радуйся, вялікая Сіла і Мужнасьць сьвятых мучанікаў;

Радуйся, любая Цішыня і Стрыманасьць пачэсных вызнаўцаў;

Радуйся, высокая Сьцяна і Цярплівасьць багалюбных манахаў;

Радуйся, ясная Зорка і Краса чыстых дзеваў;

Радуйся, ціхае Прыстанішча і Заступніца сірот і ўдоваў:

Будзь са мною ва ўсякай маёй патрэбе дзеля вялікай радасьці, якую Ты мела пры зачацьці Сына Божага; пачуй маю недастойную малітву і дапамажы мне ў суме маім. У рукі Твае аддаю самога сябе: захавай душу маю, ацалі цела маё, прасьвятлі розум, напраў учынкі мае; накіруй думкі мае да Бога, сэрца маё ўмацуй у добрым; памяць наставі ў запаветах; накіруй вочы мае да неба; сумленьне маё ачысьці ад грахоў; аддалі ад мяне пажаданьні цялесныя; адгані д'ябальскія спакусы; захавай ад агульнага сораму; ратуй ад нечаканае бяды, ня дай прыйсьці суму, жалю і роспачы; вызвалі ад вечнага агню. Прымі ад мяне гэтую пахвалу, даючы ўзамен радасьць духоўную і робячы мяне годным радасьці вечнае.

Радуйся, поўная ласкі Марыя, Госпад з Табою на вякі вякоў! Амін.