На "Госпадзе, Цябе клічу...":

Тон 8). Слаўны цуд! Творца ўсіх у міласэрнасьці сваёй зьбядніў сябе, прыняў цела і апрануўся ў нашу прыроду. Пажыўшы сярод людзей, Ён паказаў ім мноства цудаў. У Бетсаідзе Ён аздаравіў расслабленага, сказаўшы яму: "Вазьмі ложак твой".

Збавіцелю мой і Госпадзе! Жадаючы ўзьняць людзей, што ўпалі, Ты прыйшоў як чалавек, хадзіў па зямлі і ацаляў немачных у вялікай міласэрнасьці Тваёй. Прыйшоўшы да Авечай сажалкі, Ты словам Тваім узьняў і аздаравіў расслабленага, які ляжаў там трыццаць восем гадоў.

Ворагі Твае, поўныя зайздрасьці ад добрых учынкаў Тваіх, усядобры Госпадзе, абвінавацілі Цябе ў парушэньні закону, хоць самі ўсьцяж ламалі закон. Яны шукалі як забіць Цябе, існае Жыцьцё, за тое, што Ты ў суботу расслабленага ацаліў.

Тры песьні з мінеі.

Слава... цяпер...

(Тон 5). Ля Авечай сажалкі ляжаў немачны. Убачыўшы Цябе, Госпадзе, ён усклікнуў: "Ня маю чалавека, які б, калі заварушыцца вада, укінуў мяне ў яе; калі ж падыходжу, нехта мяне апярэджвае і атрымлівае аздараўленьне, а я далей ляжу немачны". Збавіцель зьмілаваўся і сказаў яму: "Я стаўся чалавекам дзеля цябе і прыняў цела, а ты кажаш: Ня маю чалавека. Вазьмі ложак твой і хадзі!" Усё магчыма Табе, усё слухаецца Цябе, усё падпарадкаванае Табе, Госпадзе: дык у міласэрнасьці Тваёй успамяні нас усіх і зьмілуйся над намі.

Вершапесьні

(Тон 3). Крыжом Тваім, Хрысьце, сьмерці ўлада зьнішчаная была і зьніштожаныя хітрасьці д'ябальскія, і род людзкі, збаўляючыся вераю, безустанку Цябе ў песьнях славіць.

Вячэрнюю песьню прыносім Табе, Хрысьце, з кадзілам і гімнамі духоўнымі: Зьмілуйся над намі і збаў нас.

Вялікая, Госпадзе, сіла крыжа Твайго! Пастаўлены на адным месцы, ён дзейнічае ва ўсім сьвеце, робячы рыбакоў апосталамі і паганаў мучанікамі, якія сёньня моляцца за нас.

Слава... цяпер...

(Тон 1). Ты, Хрысьце, што рукамі сваімі чалавека стварыў, у дабрасардэчнасьці Тваёй прыйшоў аздаравіць нядужых. Словам Тваім ты ўзьняў з пасьцелі расслабленага ля Авечай сажалкі, вылячыў немач жанчыны, што цярпела на крывацечу, зьмілаваўся над дачкой хананейкі і не пагардзіў просьбаю сотніка. Дзеля гэтага клічам : "Госпадзе, слава Табе!"

Адпушчальныя трапары: Сьвятому дня (калі ёсьць)

Слава... цяпер...: нядзельны, тон 3.