На "Госпадзе, Цябе клічу..." наступныя песьні, паўтараючы кожную:

(Тон 4). Настала сярэдзіна дзён між збавенным Уваскрасеньнем і Боскай Сёмухай. Прасьветленая зьзяньнем абодвух сьвятаў, яна злучае іх у адно і аб'яўляе славу Гасподняга ўзьнясеньня.

Сыён пачуў вестку пра ўваскрасеньне Хрыстова і ўзрадаваўся, а верныя сыны ягоныя ўсьцешыліся, калі ўбачылі, як агіда хрыстазабойства абмываецца Духам. Усё стварэньне рыхтуецца ўрачыста сьвяткаваць радаснае перапалаўленьне двух сьвятаў.

Набліжаецца, як напісана, шчодрае выліцьцё Боскага Духа на ўсіх, і сёньняшні дзень прадвяшчае спаўненьне абяцаньня, якое даў Хрыстос вучням сваім, калі пасьля сьмерці, пахаваньня і ўваскрасеньня свайго, абвясьціў ім прыйсьце Пацяшыцеля.

Слава... цяпер...

(Тон 6). Сабраўшыся, каб адзначыць сярэдзіну дзён між Тваім, Хрысьце, уваскрасеньнем і прыйсьцем Духа Боскага Твайго, славім у песьнях таямніцу цудаў Тваіх і просім паслаць нам багацьце Твайго зьмілаваньня.

Чытаньне кнігі прарока Міхея

Так кажа Госпад: "З Сыёну выйдзе закон, і слова Гасподняе з Ерусаліму; і будзе судзіць многіх людзей, і асуджаць магутныя народы далёкія". Бо ўсе людзі пойдуць, кожны сваёй дарогаю, а мы пойдзем у імя Госпада Бога нашага сёньня і давеку. Так кажа Госпад Усемагутны: "Пачуйце, горы, суд Гасподні, і слухайце пільна, асновы зямлі, бо вось Госпад будзе судзіцца з народам сваім, Ён будзе абвінавачваць Ізраіля, кажучы: Народзе мой, што Я табе ўчыніў, чым Я цябе засмуціў? Адкажы мне! Я ж вывеў цябе з зямлі ягіпскай, з дому няволі Я вызваліў цябе; і паслаў перад абліччам тваім Майсея і Аарона, і Марыям. Народзе мой, прыгадай, як раіліся супраць цябе ворагі твае. Хто абвясьціў табе?" Абвешчана было табе, чалавеча, добрае. Чаго ж жадае ад цябе Госпад, як не таго, каб ты чыніў справядлівасьць і любіў міласэрнасьць, і быў заўсёды пакорны перад Богам тваім? Бо Госпад узьвялічыцца ў магутансьці сваёй, і будзе пасьвіць статак свой у супакоі, аж да сканчэньня зямлі. (4:2-3,5;6:2-5,8)

Чытаньне кнігі прарока Ісаі

Усе сасьмяглыя, прыходзьце да вады; прыходзьце – нават калі ня маеце чым заплаціць, – купляць віно і малако. Бо так кажа Госпад Усемагутны: "Людзі мае, чэрпайце з весялосьцю ваду з крыніцы збаўленьня". І скажаш у той дзень: "Сьпявайце Госпаду, гукайце імя Яго, абвяшчайце сярод усіх народаў славу Яго, успамінайце вялікае імя Яго". Людзі мае, паслухайце Мяне, і будзеце спажываць прысмакі, і душа ваша насыціцца дабром. Прыхіліце вушы вашыя і ідзеце па маім шляху, паслухайце Мяне, і душа ваша жыць будзе ў дабрабыце; і Я дам вам вечны запавет, калі вы паклічаце Мяне і захочаце наблізіцца да Мяне. Няхай нязбожны пакіне свой шлях, і чалавек беззаконны адмовіцца ад сваіх намераў і навернецца да Мяне, і Я зьмілуюся над ім і ачышчу грахі яго. Бо думкі Мае не такія, як думкі вашыя, і шляхі вашыя не такія, як шляхі Мае, – кажа Госпад.– І так як неба вышэй за зямлю, так шлях мой далёкі ад шляху вашага, і думкі вашы ад думак маіх. І так як дождж або сьнег, што зыходзіць з неба на зямлю і не вяртаецца назад, пакуль не напоіць зямлю, ня зробіць яе пладавітаю, і не запэўніць ураджаю, каб прынесьці насеньне сейбіту і хлеб чалавеку: так і слова, што выходзіць з вуснаў Маіх, не вернецца да Мяне бясплодным перш як асягне тое, што Я хацеў, і выканае пасьпяхова сваё пасланство. Дык выходзьце вясёлыя, хай вас вядуць у супакоі: горы і ўзгоркі будуць перад вамі радасна скакаць, і дрэвы польныя махаць галінкамі сваімі. Замест пустазельля вырастуць кіпарысы, замест крапівы – мірт. Будзе гэта на хвалу Гасподнюю, як вечны і незьнішчальны помнік". Так кажа Госпад Усемагутны. (55:1-3;6-13)

Чытаньне кнігі Прыповесьцяў

Мудрасьць збудавала сабе дом і вычасала сем стаўпоў да яго. Забіла свае ахвяры, зьмяшала віно сваё і прыгатавала стол. Паслала слуг сваіх клікаць моцным голасам на пачастунак, кажучы: "Хто прастадушны, хай прыходзіць да мяне". А тым, што жадалі мудрасьці, казала: "Хадзеце, ешце мой хлеб, піце віно, якое я зьмяшала; пакіньце дурасьць – і будзеце жыць; хадзіце шляхамі разважнасьці". Хто жадае навучаць насьмешніка, накліча на галаву сваю няславу; а хто дакарае грэшніка, сам сабе шкодзіць. Не дакарай насьмешніка, бо ён цябе ўзьненавідзіць. Папраў мудрага і ён цябе любіць будзе. Дай мудраму раду, і ён стане мудрэйшым. Навучы праведніка, і ён пабольшыць веды свае. Пачатак мудрасьці – страх Гасподні; і спазнаваньне Сьвятога – розум. Дзякуючы мне дні твае прадоўжацца, і памножыцца лік гадоў тваіх. (9:1-11)

Вершапесьні

(Тон 1). Калі настала палова дзён Сёмухі, Хрыстос паказаў боскую сілу сваю: Ён ацаліў словам сваім расслабленага і ўзьняў яго з ягонай пасьцелі. Будучы ў людзкім целе, Ён боскім спосабам цуды рабіў і даваў людзям вечнае жыцьцё і багацьце свайго зьмілаваньня.

Верш. Успомні народ Твой, які Ты ад пачатку прызначыў для сябе

У палове сьвята, Ты, Мудрасьць Божая, прыйшоў у сьвятыню, дзе навучаў і выкрываў непакорлівых фарысэяў і кніжнікаў, і казаў усім: "Хто мае смагу, хай прыходзіць да Мяне і п'е жывую ваду, каб ня мець больш смагі давеку; хто верыць у Маю дабрыню, у таго з улоньня пацякуць струмені жыцьця вечнага". Слава велічы дабрыні і спагадлівасьці Тваёй, Хрысьце Божа наш!

Верш. Бог – Уладар наш спрадвеку, Ён учыніў збаўленьне пасярод зямлі.

(Тон 2). Калі настала палова сьвята, прыйшоў Ісус у сьвятыню і вучыў непакорлівых людзей, кажучы: "Хто мае смагу, хай прыходзіць да мяне, і п'е ваду жывую вечную, і ён не будзе мець смагі давеку. Рэкі пацякуць з улоньня таго, хто верыць у Мяне, і ён будзе мець сьвятло жыцьця".

(Тон 8). У палове сьвятых дзён, калі Ты, Збавіцелю, навучаў, юдэі казалі між сабою: "Як гэта Ён ведае пісаньні, не вучыўшыся?" Не разумелі яны, што Ты – Мудрасьць, якою сьвет быў створаны. Слава Табе!

Адпушчальны трапар

(Тон 8). У палове сьвята сасьмяглую душу маю вадою набожнасьці напаі, Збавіцелю, бо Ты ж некалі ўсклікнуў да ўсіх: "Хто мае смагу, хай прыходзіць да Мяне і п'е". Крыніца жыцьця нашага, Хрысьце Божа, слава Табе.