(Тон 4). Разбурыўшы дзяржаву сьмерці, Ты, Хрысьце, сьмерцю Тваёю людзям жыцьцё дараваў, і слаўным уваскрасеньнем у спагадлівасьці Тваёй узьняў род людзкі. Дзеля гэтага пяем Табе песьню хвалы і ўдзячнасьці, сьвяткуючы сьвята трохдзённага сьветлага ўваскрасеньня Твайго, палова якога сёньня мінула, Ісусе Жыцьцядаўча, Збавіцелю душ нашых.

Перад Тваім пачэснынм Крыжам і мукамі, Ты, Хрысьце ўсемагутны, чыніў слаўныя цуды сярод людзей і, як напісана, у палове законнага сьвята стаў і ўсклікнуў, каб усе чулі: "Хто мае смагу, хай прыходзіць свабодна да мяне і чэрпае пітво боскае, ваду жывую. Я даю ўсім ваду жыцьця і сілу мудрасьці, у чалавекалюбстве маім дабравольна ўпадобніўшыся да людзей".

У бязьмежным чалавекалюбстве Тваім, шматміласэрны Хрысьце, перад Тваімі мукамі, калі Ты як Бог захацеў дабравольна пацярпець, Ты паказаў людзям мноства цудаў; і цяпер мяне, які ляжу, зьняможаны і аслаблены правінамі, узьнімі, як некалі расслабленага, і накіруй на шлях боскіх запаветаў Тваіх.

(Тон 2). Калі Ты, Хрысьце Божа, прыйшоў у палове сьвята ў сьвятыню, тады Ты навучаў людзей, кажучы: "Хто верыць у Мяне, калі і памрэ, жыць будзе". А гэбрэі з фарысэямі, садукеямі і кніжнікамі, поўныя злосьці, казалі: "Хто гэты блюзьнерца?". Не разумелі яны, што Ты вечна існуеш, роўны славаю Айцу і Духу: Божа наш, слава Табе.

Вершапесьні

(Тон 3). Мукамі Тваімі, Хрысьце, Ты зацьміў сонца, і зьзяньнем уваскрасеньня Твайго Ты прасьвятліў усё. Прымі нашу малітву, Чалавекалюбча.

Па ўсёй зямлі разышлося ваша навучаньне, сьвятыя апосталы; вы разбурылі ідальскую спакусу багаразумным прапаведаньнем; добры высілак ваш, блаславёныя, дзеля гэтага славім і ўсхваляем вашу памяць.

Мучанікі Твае, Госпадзе, вераю ўмацаваныя, надзеяю падтрымліваныя і зьяднаныя любоўю да Крыжа, мучыцеля ворага зьніштожылі і, атрымаўшы вянцы перамогі, з бесьцялеснымі анёламі моляцца за душы нашы.

(Тон 3). У палове сьвята славім Таго, хто ўчыніў збаўленьне пасярод зямлі. Паміж двух злачынцаў Жыцьцё на дрэве вісела, адказваючы маўчаньнем на блюзьнерствы аднаго, а другому, які ўверыў, сказаўшы: "Сёньня яшчэ будзеш са Мною ў раі". Зышоўшы ў магілу, Ён паланіў пекла і ўваскрос на трэці дзень для збаўленьня душ нашых.

Адпушчальныя трапары.

Трапар Паловы сьвята (тон 8). У палове сьвята сасьмяглую душу маю вадою набожнасьці напаі, Збавіцелю, бо Ты ж некалі ўсклікнуў да ўсіх: "Хто мае смагу, хай прыходзіць да Мяне і п'е". Крыніца жыцьця нашага, Хрысьце Божа, слава Табе.