(Тон 6). Ты паказаўся баганосцам, увесь прасьветлены Боскім сьвятым памазаньнем і поўны Духа Сьвятога. Асьветлены зьзяньнем, што праменіцца ад Бога, ты ўваходзіў у сьвятое сьвятых, каб прычасьціцца ласкі сьвятых тайнаў. Цяпер, як сапраўдны і слаўны сьвятаначальнік, маліся няспынна за збаўленьне душаў нашых.

Жыцьцё тваё зьзяла сьвятлом дабрадзейнасьцяў, і ты быў сапраўдным прамяністым сонцам, што верных прасьвятляе і цемру спакусы разгняе, сьвятаначальніку блаславёны, ойча .... Цяпер ты пасяліўся, дзе зьзяе незаходнае сьвятло, ласкаю Духа Сьвятога стаўшыся сынам дня. Дзеля гэтага сёньня спраўляем радасна тваю сьветлую памяць і з любоўю славім цябе.

Розум твой, блаславёны ойча, скіраваны да Бога і ўпрыгожаны вераю, сьветла аб'явіўся ўсім у тваім сьмяротным і тленным целе. Раздумваючы пра нятленнасьць, ты, мудры, асягнуў спакой анёлаў і аздобіўся бясстраснасьцю, стаўшыся непадуладным цялесным пажаданьням. І сёньня, ойча наш сьвятаначальніку ..., ты зьяўляешся ясным сьветачам і молішся за ўсіх, што з любоўю шануюць памяць тваю.

Багародзічны (тон 6). Радуйся, спаўненьне Закону; радуйся, хораме Сьвятое Тройцы; радуйся, Нявеста нятленная; радуйся, носьбітка Ўладара ўсіх; радуйся, духоўны агонь, што носіш у руках Тваіх, быццам у шчыпцах, гарачы вугаль; радуйся, раю новы, садзе зачынены, сьветлае боскае застольле, галубка чыстая, пасадзе Ўсявышняга, Боскае духоўнае ложа, бо Цябе, Дзева, Дух Сьвяты ацяніў.

Крыжабагародзічны (тон 6). Калі беззаганная Дзева і Чыстая Ўладарка ўбачыла Сына свайго, узьнесенага на крыжы, Яна па-матчынаму заплакала і ў зьдзіўленьні ўсклікнула: “Дзіця мілае, што гэта за новае і дзіўнае зьявішча? Як гэта няўдзячныя людзі аддалі Пілату на суд і асудзілі на сьмерць Жыцьцё ўсіх? Слаўлю Тваю, Слова, невыказную спагадлівасьць”.

Адпушчальны трапар

(Тон 4). Правілам веры і прыкладам лагоднасьці, настаўнікам устрыманасьці ты быў на справе для статку твайго; дзеля гэтага ты дасягнуў вышыняў пакораю, здабыў багацьці ўбогасьцю. Ойча сьвятаначальніку ..., малі Хрыста Бога, каб Ён збавіў душы нашыя.