Трапар (тон 8). Адзіны Творча і Госпадзе, што глыбінёю мудрасьці Тваёй уладаеш усім і чалавекалюбна даеш карыснае кожнаму з нас, супакой душы слуг Тваіх, бо яны ўсклалі ўсю надзею на Цябе, Тварца, і Ўладара, і Бога нашага.

Кандак (тон 8). Са сьвятымі супакой, Хрысьце, душы слуг Тваіх, дзе няма ні болю, ні суму, ні плачу, але жыцьцё бясконцае.

Кандак Багародзіцы (тон 8). Ты – наша сьцяна і прытулак, і спагадлівая заступніца перад Богам, якога нарадзіла Ты, Багародзіца ўсячыстая, верных збаўленьне.

Пракімен (Пс 24:13,1). Душы іх у шчасьці жыць будуць

Верш. Да Цябе, Госпадзе, я ўзьняў душу маю, Божа мой, не адмоўчвайся ад мяне.

Апостал: 1 Сал 4:13-17

Алілуя (Пс 64:5; 24:13). Шчасьлівыя, каго Ты выбраў і прыняў, Госпадзе: памяць іх жыць будзе з пакаленьня ў пакаленьне.

Верш. Душы іх у шчасьці жыць будуць,

Евангельле: Ян 5:24-30

Прычасьнік (Пс 64:5). Шчасьлівыя, каго Ты выбраў і прыняў, Госпадзе: памяць іх жыць будзе з пакаленьня ў пакаленьне. Алілуя, алілуя, алілуя.

Водпуст. Хрыстос, праўдзівы Бог наш, які ўваскрос з мёртвых, і жывымі і мёртвымі ўладае, малітвамі ўсячыстае свае Маці; сьвятых, слаўных і годных пахвалы апосталаў; сьвятых, слаўных і пераможных мучанікаў; сьвятых і баганосных айцоў нашых, душы адышоўшых ад нас слуг сваіх у жыльлях сьвятых хай паселіць, ва ўлоньні Абрагама хай супакоіць і да праведнікаў залічыць; і над намі ўсімі хай зьмілуецца і збавіць нас, бо Ён добры і Чалавекалюбец.

Сьвятар: У блаславёным сьне іх дай, Госпадзе, знайсьці вечны супакой душам памерлых слугаў Тваіх і ўчыні ім вечную памяць.

Людзі: Вечная памяць (Тройчы)