ВЯЧЭРНЯ

На "Госпадзе, Цябе клічу...") – шэсьць песьняў нядзельных належнага тону, пасьля – чатыры наступныя:

(Тон 5): Зазьзяй, Крыжу Гасподні, промнямі ласкі ў сэрцах тых, што шануюць цябе. З любоўю абдымаем цябе, жаданьне сьвету ўсяго. Ты асушыў нашыя сьлёзы суму, і мы, выбаўленыя ад сьмяротнай пасткі, вярнуліся да бясконцай радасьці. Пакажы нам славу тваёй красы і дай узнагароду за ўстрыманасьць слугам Тваім, якія ў веры шукаюць заступніцтва Твайго і велічы зьмілаваньня.

Радуйся, жыцьцядайны Крыжу, Царквы раю дзівосны, дрэва нятленнасьці, што ўзрасьціла нам асалоду вечнае славы. Ты – прагнаньне бесаў і радасьць анёлаў, Табою цешыцца мноства верных. Ты – неадольная зброя, аснова непарушная, уладароў перамога, сьвятароў пахвала. Дай нам дачакацца мукаў Хрыстовых і велічы зьмілаваньня.

Радуйся, жыцьцядайны Крыжу, набожнасьці неадольная сіла, брама райская, верных умацаваньне, Царквы абарона: табою тленнасьць была зьнішчаная і адмененая, і патаптаная сьмерці ўлада, і мы ўзьняліся ад зямлі да неба. Ты – зброя непераможная, бесаў пераможца, слава мучанікаў, сьвятых сапраўдная краса, прыстанішча збаўленьня, што дае сьвету веліч зьмілаваньня.

Прыйдзі, першая пара людзей, што хітрасьцю чалавеказабойцы ўпала з вышыняў, пакаштаваўшы дрэва горкую слодыч. Вось сапраўды пачэснае дрэва зьяўляецца: дык прыйдзіце, радасна цалуйце яго і ўсклікніце з вераю: "Ты – наша абарона, найпачэсны Крыжу, блаславёнае дрэва, нябесны парастак. Пакаштаваўшы плоду твайго, мы вярнуліся зноў у першы рай і атрымалі нятленнасьць і веліч зьмілаваньня".

(Тон 3): Хрысьце, Божа наш, што з уласнай волі прыняў укрыжаваньне дзеля агульнага ўваскрасеньня роду людскога і крыжовым пяром, абмачыўшы пальцы ў чырвані крыві Тваёй, у велічы чалавекалюбства Твайго, уладарна падпісаў нам усім адпушчэньне: не пакінь нас цяпер, каб нам не аддаліцца зноў ад Цябе; але зьмілуйся, адзіны Доўгацярплівы, над Тваімі людзьмі ў бядзе, і захавай нас ад усякіх напасьцяў, бо Ты ўсё можаш.

Вершапесьні

(Тон 4): Госпадзе, які дапамог лагоднаму Давіду чужынца перамагчы, будзь абаронцам прававерных хрысьціянаў і крыжовай зброяю перамажы нашых ворагаў. Пакажы нам, Добрасардэчны, Твае даўнейшыя міласьці, каб зразумелі ўсе, што Ты – сапраўды Бог наш. Спадзеючыся на Цябе, перамагаем усе нягоды і молімся Найчыстай Маці Тваёй, каб нам атрымаць веліч зьмілаваньня Твайго.

Адпушчальныя трапары

Трапар Крыжа (Тон 1): Збаў, Госпадзе, людзей Тваіх і блаславі набытак Твой. Даруй супакой сьвятой Тваёй Царкве і перамогу над усімі нягодамі, і захавай верны Твой народ сілаю Твайго крыжа.