(Тон 8). Прыйдзіце, верныя, уславім грамаду сьвятых айцоў, Антона Вялікага, сьветлага Яўтыма, і з імі ўсіх іншых духоўных грамадзян новага раю. Усклікнем: "Вось дрэвы, якія насадзіў Бог наш; яны прарасьцілі плады жыцьця вечнага, прынесьлі іх Хрысту і кормяць душы нашы. Дык будзем прасіць іх: "Баганосныя блаславёныя айцы, маліцеся за збаўленьне наша". (Двойчы)

Радуйся, Ягіпет верны, радуйся, сьвятая Лібія, радуйся, выбраная Тэбаіда; радуйцеся, усякае месца, горад і краіна, што ўзгадавалі грамадзянаў валадарства нябеснага, узрасьцілі іх устрыманасьцю і подзьвігамі, і аддлі іх, дасканалых, Богу. Яны – сьветачы душаў нашых, што зазьзялі духоўна на ўвесь сьвет цудамі, магутнымі знакамі і ўчынкамі. Дык усклікнем усе: "Блаславёныя айцы, маліцеся за збаўленьне душ нашых". (Двойчы)

Хто з тых, што нарадзіліся на зямлі, зможа расказаць вашы цудоўныя жыцьці, сусьветныя айцы? Які язык здольны ўславіць вашыя духоўныя подзьвігі, практыкаваньні ў дабрадзейнасьцях, умярцьвленьне цела, змаганьне з пажаданьнямі ў нядрэмнасьці, у малітвах, у сьлёзах? Вы на сьвеце жылі быццам анёлы, перамогшы бесаўскія сілы, чынячы цудоўныя і вялікія знакі. Дык маліцеся цяпер за нас, блаславёныя, каб нам атрымаць вечную радасьць. (Двойчы)

(Тон 6). Захаваўшы вобраз Божы непашкоджаным, вы наставілі розум ваш на змаганьне са згубнымі пажаданьнямі: мужна абуздаўшы вашую прыроду, вы падпарадкавалі горшае лепшаму, цела пакарылі духу. Дзеля гэтага вы, жыхары пустыні і падзьвіжнікі, сталіся найвышэйшым прыкладам для манахаў, і выдатным правілам дабрадзейнасьцяў для ўсіх, што імкнуцца да Бога. Цяпер, прабываючы ў небе, быццам у чыстым люстры, бачыце Сьвятую Тройцу, молячыся няспынна за тых, што з вераю і любоўю шануюць вас.

Цяпер...: дагматык належнага тону.

Пракімен дня: Ты мой заступнік, Божа...

Чытаньне кнігі прарока Захара (8:19-23)

Так кажа Госпад: "Пост чацьвертага, пост пятага, пост сёмага і пост дзесятага месяца хай заменіцца для дому Юды ў радасьць, вясельле і сьвята прыемнае. Дык узрадуйцеся і палюбіце праўду і супакой".

Так кажа Госпад Усемагутны: "У будучыні прыйдуць людзі, жыхары многіх местаў. Жыхары аднаго места, ідучы да другога, будуць казаць: Пойдзем аддаць хвалу Госпаду, шукаць Госпада сіл – і я таксама іду. І так вось шматлікія людзі, магутныя народы будуць шукаць Госпада сіл, каб аддаць хвалу Яму".

Так кажа Госпад Усемагутны: "У тыя дні станецца, што дзесяць мужоў з розных народаў і моваў, схопяцца за край вопраткі мужа з Юды, кажучы: Хочам ісьці з вамі, бо мы чулі, што з вамі Бог".

(Тон 2). Ачысьцім, браты, ад усякай брыдоты нашыя целы і душы, запалім сьвечы душаў нашых полымем любові да ўбогіх, і ня будзем больш абмаўляць адзін аднаго: бо вось настаў час, калі Жаніх прыходзіць даць кожнаму паводле ўчынкаў яго. Дык увойдзем разам з мудрымі дзевамі да Хрыста, і ўсклікнем, як некалі разбойнік: "Успомні нас, Госпадзе, калі прыйдзеш у валадарства Тваё". (Двойчы)

Сьвятых мучанікаў малітвамі і ўслаўленьнем Хрыста ўсякая мана разьвейваецца, і род людзкі вераю збаўляецца.

(Тон 8). Сёньня аддаем пашану вам, сьвятыя манахі, айцы і настаўнікі: ад вас і мы навучыліся хадзіць па правых сьцежках Шчасьлівыя вы, бо, паслужыўшы Хрысту і перамогшы варожую сілу, вы сталіся субяседнікамі анёлаў і спаўжыхарамі ўсіх сьвятых і праведнікаў. З імі разам маліцеся Госпаду, каб Ён зьмілаваўся над намі.

Багародзічны. Радуйся, скарбніца чысьціні; радуйся, нярэчыўнага Сьвятла чыстае жыльлё; радуйся, Начальніца збаўленьня нашага, апосталаў прапаведаваньне; радуйся, пахвала мучанікаў; радуйся, спаўненьне прароцкіх сказаньняў; радуйся, Краса падзьвіжнікаў і манахаў, і збаўленьне верных.

Адпушчальныя Трапары

(Тон 4). Божа айцоў нашых, Ты паступаеш з намі з Тваёй заўсёднай лагоднасьцю: не пераставай быць спагадлівым да нас, але малітвамі іх кіруй у супакоі нашым жыцьцём.

Багародзічны (тон 4). Тайна спрадвеку ўкрытая і анёлам няведамая праз Цябе, Багародзіца, тым, што жывуць на зямлі, сталася яўнаю: Бог прыняў цела ад Цябе, спалучыўшы ў сабе без зьліцьця дзьве прыроды і, пацярпеўшы дзеля нас дабравольна на крыжы, уваскрасіў ім першастворанага і выбавіў ад сьмерці душы нашыя.