На „Госпадзе, Цябе клічу...“:

(Тон 4). Ты, сьветлы арханёле, стаіш у прысутнасьці трохсонечнага Боства і служыш Яму разам з іншымі анельскімі сіламі, радасна ўсклікаючы: „Сьвяты Ты, Ойча; Сьвяты Ты, Спрадвечнае з Айцом Слова; Сьвяты Ты і Духу Сьвяты – адзіная слава, адзіная сутнасьць і ўлада, адзінае Боства і сіла!“

Выгляд твой, арханёле Міхале, вогненны, і краса твая дзівосная. Тваёй духоўнай існасьцю ты праходзіш увесь сьвет, выконваючы загады Тварца ўсіх. Вядомы з сілы тваёй, ты ўчыніў царкву тваю крыніцаю аздараўленьняў.

Ты, Госпадзе, як напісана, робіш нябесныя духі пасланцамі Тваімі, і слугамі Тваімі полымя агню. На чале анёлаў Тваіх Ты паставіў Міхала, які выконвае Твае загады і са страхам сьпявае тройчы сьвятую песьню славе Тваёй.

(Тон 6). Радуйцеся з намі, анельскія хоры, бо ваш начальнік і наш заступнік вялікі арханёл сёньня зьяўляецца ў пачэснай царкве сваёй і асьвячае яе. Дзеля гэтага належна ўславім яго, клічучы: „Пакрый нас покрывам крылаў тваіх, вялікі арханёле Міхале“.

Радуйцеся з намі, хоры дзеваў, бо вось Заступніца нашая, хадайніца і покрыва, і надзейны прытулак, сёньня на пачэснай і боскай урачыстасьці сваёй сумных пацяшае. Дык аддамо Ёй належную славу і ўсклікнем: „Пакрый нас боскім заступніцтвам Тваім, Усячыстая Багародзіца Дзева!“

Вершапесьні актойха.

Слава... цяпер...

(Тон 8). Як ваявода і абаронца, і анёлаў найвышэйшы начальнік, ад усякай патрэбы і суму, ад недамаганьняў і лютых грахоў вызваль, арханёле слаўны, тых, што з вераю славяць і моляць цябе. Ты, нярэчыўны сам, бачыш Нярэчыўнага, і прабываеш у недаступным зьзяньні Уладара, які ў чалавекалюбстве сваім дзеля нас прыняў цела ад Дзевы, каб збавіць род людзкі.

Адпушчальны трапар

(Тон 4). Нябесных сіл ваявода, мы недастойныя няспынна молім цябе, каб ты ахінуў нас тваімі малітвамі і пакрыў ценем крыл духоўнае твае славы, ахоўваючы нас, якія прыбягаем да цябе і ўсклікаем: „Ад бедаў выбаў нас, начальнік вышніх сіл“.