і сьвятога Максіма Вызнаўцы (з 13 жніўня)

Вячэрня

На "Госпадзе, Цябе клічу ...":

Мучанікаў (тон 3). Вы, слаўныя мучанікі, не збаяліся ні агню ні мяча, ні злосьці лютага ворага, ні пашчаў львоў, ні катлоў з варам, ні адсячэньня галавы, ні горкае сьмерці, на якую засудзілі вас мучыцелі, адаслаўшы вас такім чынам да несьмяротнага Бога.

Слаўныя мучанікі, Вы атрымалі блаславёны і жаданы канец, прадмет вашай вечнай надзеі; цяпер выліваеце струмені цудаў, суцішаючы полымя пажаданьняў цялесных і душэўных для тых, што набожна спраўляюць памяць вашу.

Фоці слаўны і багамудры Анікіта – адважная пара, упрыгожаная зьзяньнем Тройцы і апранутая ў красу ранаў, – з анёламі вечна радуюцца і даюць прасьвятленьне і разуменьне тым, што з вераю спраўляць іхнюю памяць.

Максіма (Тон 4). Той, хто дзеля літасьці да нас дабравольна стаўся чалавекам, паказаў, што мае дзьве волі і два дзеяньні: так ты, Максіме, навучаў і зачыняў вусны бессаромнікаў. Ты ўвесь час прапаведаваў супраць тых, што, спакушаныя д'яблам, цьвердзілі, што Хрыстос мае толькі адну волю і адно дзеяньне.

Блаславёны Максіме, ты сілаю вучэньня твайго змусіў замоўкнуць ілжывага Піра; за гэта ты цярпеў перасьлед і выгнаньне, і адсячэньне языка і правае рукі, якую ты заўсёды ўзносіў у малітве да Бога і якою ты пісаў твае натхнёныя словы.

Быццам пяро, абмочанае Духам, быў твой, блаславёны Максіме, язык, які ласкаю пісаў на табліцах сэрцаў нашых закон Боскіх дабрадзейнасьцяў і яснае вучэньне аб уцелаўленьні ў дзьвюх прыродах і адной асобе Хрыста.

Слава ...:

(Тон 8). Шануем цябе, ойча Максіме, як духоўнага правадніка, які паказаў нам, як ісьці па правым шляху. Блаславёны ты, бо ты служыў верна Хрысту і асудзіў і выкрыў моцнага ворага. Цяпер ты прабываеш з анёламі і з усімі сьвятымі. Разам з імі маліся Госпаду даць зьмілаваньне душам нашым.

Цяпер ...:

(Тон 8). Змрок Законны праясьнеў сёньня сьветлай хмараю перамяненьня; Майсей і Ільля, удастоіўшыся ў ёй бачыць зьзяньне славы, усклікнулі: "Ты Бог наш і Ўладар спрадвечны!".

Вершапесьні

(Тон 2). Наблізімся да Таборскай гары, каб бачыць славу Хрыста, нашага Збавіцеля і ўладара ўсіх.

Верш. Тваё ёсьць неба і Твая зямля.

Збавіцелю мой, Ты зьявіўся на гары Таборскай разам з Майсеем і Ільлёю, і выбраныя вучні твае бачылі, як Ты зьзяеш ярчэй за сонца.

Верш. Табор і Гэрмон у імю Тваім узрадуюцца.

Выбраныя вучні Твае, пачуўшы голас Айца, які прагалошваў славу Тваю, палі ніцма на зямлю.

Слава ...:

(Тон 6). Ойча сьвяты, па ўсёй зямлі разышлася вестка аб тваіх добрых учынках; ты атрымаў узнагароду ў небе за твае высілкі, якімі ты перамог дэманаў і ўдастоіўся быць спаўжыхарам анёлаў, жыцьцё якіх ты пераймаў на зямлі. Маючы вялікі давер у Хрыста Бога, прасі ў яго супакою душам нашым.

Цяпер ...:

(Тон 5). Паказаўшы крыху Боства Твайго тым, што ўзышлі з Табою на гару, Ты, Збавіцелю, зрабіў іх удзельнікамі Тваёй бязьмежнай славы, і яны ўсклікнулі: "Добра нам тут". З імі разам і мы Цябе, Хрысьце Збавіцелю, што перамяніўся на гары, няспынна славім.

Адпушчальныя трапары

Мучанікаў (тон 4). Мучанікі Твае, Госпадзе, у цярпеньнях вянцы нятленныя атрымалі ад Цябе, Бога нашага: маючы сілу Тваю, яны перамаглі мучыцеляў і зьнішчылі дэманаў нікчэмную дзёрзкасьць. Малітвамі іх збаў душы нашыя.

Слава ...:

Сьвятога (тон 8). Правай веры настаўнік, набожнасьці прыклад і чысьціні, сьветач сусьветны, Богам натхнёная сьвятароў аздоба, Максіме мудры, навукаю тваёю ты ўсіх прасьвятліў, жалейка духоўная. Малі Хрыста Бога збавіць душы нашыя.

Цяпер ...:

Перамяненьня (тон 7). Перамяніўся Ты на гары, Хрысьце Божа, паказаўшы вучням Тваім, наколькі яны маглі ўспрыняць, славу Тваю. Хай і для нас зазьзяе сьветласьць Твая вечная малітвамі Багародзіцы. Сьветладаўча, Слава Табе!